【海城回憶】 阿梅羅文都唱過 陳潔靈:當年唔會有黃牛

更新時間 (HKT): 2018.05.10 18:40
陳潔靈日前接受專訪,細訴當年喺「海城」演出嘅點滴。

今時今日樂迷睇演唱會,可以選擇去紅館、九展、會展或各類型嘅場地,但早喺上世紀七、八十年代,上述場地仲未落成嗰個年代,香港人究竟有咩地方睇表演?原來當時有一種叫做酒樓夜總會,唔少天皇巨星包括羅文、甄妮、徐小鳳、張國榮、梅艷芳同陳百強等都曾經喺嗰度演出,呢種酒樓夜總會 佔地大而且有齊舞台同燈光音響,喺當時嚟講屬於頂級嘅演出場地。

而喺芸芸酒樓夜總會入面,位於尖沙嘴新世界中心嘅「海城酒樓夜總會」,就係當時表演場地嘅表表者,差不多晚晚都有唔同歌手表演,而且座無虛席,可謂見證住本地樂壇同香港社會最輝煌嘅時刻。

至於當年嘅「海城」究竟有幾盛世?日前陳潔靈(Miss Chan Chan)就連同甄詠蓓一齊現身海城原址,現在經重建翻新成為「Victoria Dockside」,接受傳媒訪問,細訴當年喺「海城」演出嘅點滴。Miss Chan Chan首先話:「喺海城演出最多嘅係徐小鳳同羅文,我記得每年羅文同海城簽一百場騷,逢新年檔期就一定係徐小鳳同大家唱《喜氣洋洋》 ,其他日子就有阿梅(梅艷芳)、Leslie(張國榮),Danny(陳百強)同我都有唱過,但唔係最多嗰個。」

Miss Chan Chan表示喺當時仍未有紅館嘅時代,能夠登上「海城」舞台演出已經係一種肯定:「首先有啲似o依家紅館入紙排期咁,因為所有檔期都有唔同歌手排緊,咁你要唱首先都要有一定嘅叫座力,其次『海城』當年擁有好好嘅配套,有齊燈光音響,仲有伸縮、旋轉舞台,台前仲有舞池可以畀觀眾跳舞。」Miss Chan Chan話每次喺「海城」演出起碼都會唱足一個星期,場地可以容納超過一千人:「你一路喺台上唱,台下就係一家大細喺度食飯,所以以前嗰個年代唔係賣飛,係一圍圍咁訂枱,嗰晚有表演就喺晚飯價錢上再加錢。」咁嗰個年代一定唔會好似o依家咁逢演唱會都出現黃牛黨搶飛啦?Miss Chan Chan笑住話 :「當年去買黃牛就傻仔啦,因為係要一圍圍枱咁訂,而且晚晚都有得唱,根本唔會有黃牛飛出現。」

事隔多年重臨舊地,Miss Chan Chan同甄詠蓓都坦言,「海城」及新世界重建變成「Victoria Dockside」後,當年嘅感覺已經一點不留,取而代之係摩登及藝術氣氛,希望「Victoria Dockside」喺2019年初全面落成啟用後,可以再到訪並有機會參與藝術演出。而今年Miss Chan Chan將於演藝學院舉行《由靈開始》演唱會,呢次係佢相隔24年再度舉行演唱會,更搵咗小美為哥哥張國榮金曲《由零開始》重新譜詞為《由靈開始》,非常有義意。

採訪、攝影:曹家誠

娛聞樂陪你走遍全球追星,即Like「娛果」FB 專頁!
BannerBanner