【以梁天琦為拍攝對象】紀錄片《地厚天高》獲獎 導演林子穎:觀眾睇到喊

更新時間 (HKT): 2018.05.11 18:02

由女導演林子穎(Nora)拍攝嘅紀錄片《地厚天高》,以本民前梁天琦為拍攝對象。電影早前參加咗喺台灣舉行嘅國際紀錄片影展頒獎典禮,噚晚獲頒發華人紀錄片獎嘅評審團特別獎。喺典禮上導演要出席放映後分享會,所以由監製任硯聰代領,佢形容導演係一位唔怕死導演,對於獲獎心情複雜,監製喺台上話:「一方面十分高興並虛心接受這個獎,一方面片裡的主角梁天琦,正面對法庭裁決,可能要坐十年。」《地》舊年喺香港公映過,獲第24屆香港電影評論學會大獎八部推薦電影之一,但未能入圍今屆金像獎新晉導演獎。

導演Nora今日接受本報訪問,講到得獎感受,佢話:「攞獎當然開心,影展都好大,其他電影質素都好高,所以冇諗過攞獎。呢個時期套戲攞獎或者係香港以外地方,有好成績或者可以重演。加上天琦就嚟判,梁頌恆、游蕙禎判咗啦,將佢哋情況畀更多人見到,對於觀眾係好消息。好多睇完之後,對片中嘅主角有信心。反應幾好,問啲問題都幾深入,冇expect過,佢哋好多睇完都好感動同關心,可能佢哋都經歷過學運,參與過社會運動,經歷嘅同我片中嘅人都好似。佢哋compare香港同台灣情況,香港係點呢?印象深刻係第二場放映,有啲香港去台灣讀書嘅觀眾睇到喊,覺得好灰暗。不過套戲tagline都講『o依家好似乜都做唔到,但係做好本份先。』」

紀錄片《地厚天高》片長約90分鐘,以本民前前發言人梁天琦為拍攝對象。時序由佢16年因為旺角騷亂被捕開始,追塑佢喺香港大學成長嘅經歷,如何加入本民前,到參加立法會補選同換屆選舉。直至佢官司纏身、立法會候選人資格被剝奪後,到美加進修同演講為止。電影紀錄咗梁天琦其間嘅心路歷程。

娛聞樂陪你走遍全球追星,即Like「娛果」FB 專頁!
BannerBanner