【曾蔭權細仔舊愛】邱德根38歲孫女戀上賽車手 未婚陀女 

更新時間 (HKT): 2018.05.11 00:00

已故亞視創辦人邱德根孫女、即邱達昌大女邱詠筠(Winnie)一向戀事低調,最為人所共知係佢曾同過曾蔭權細仔曾慶淳拍拖。二人分手後,Winnie亦未再帶過男友現身公開場合。

原來Winnie近月已有BB,快將做媽咪,上星期六,賭王二房長女何超瓊同利豐集團太子女馮詠儀就幫佢喺中環搞咗個baby shower嘅party,唔少城中富二代嚟賀呢位準媽媽,當中有何超鳳、澳門前特首何厚鏵千金何芓諄、林建岳三個囡囡林恬兒、林灝伊同林心兒、東亞銀行李國寶兩個新抱鄺淑嫻同馮靈針同恒基千憶新抱徐子淇等。

馮詠儀日前就擺咗唔少派對相上Ig,場面熱鬧,當中主角Winnie嘅兩個妹邱詠麒同邱詠賢陪伴左右,身穿藍色碎花裙同牛仔褸嘅佢已腹大便便,目測至少都有7、8個月身孕。成個派對就好窩心準備咗好多藍色同粉紅色cupcakes,等成班賓客估吓生仔定生女,最終就由Winnie切蛋糕宣佈呢胎陀女。

今次Baby shower出席者只係得女子組朋友,而Winnie嘅男友董荷斌,係荷蘭籍華人,父母早年移居荷蘭,同時佢係一名賽車手,喺國際賽車圈有華人第一車手之名,佢仲係首位華裔一級方程式(F1)試車手。35歲嘅佢,細Winnie三歲,因生得似台灣歌手林志穎,初入賽車界時被冠以「賽車界林志穎」嘅花名,03年曾羸出亞洲寶馬方程式,而06年就贏過三級方程式冠軍,目前仍然活躍賽車界,近年加盟成龍所擁有嘅耀萊成龍DC車隊,舊年喺法國Le Mans耐力賽,贏得全場亞軍。

據知,Winnie同董荷斌戀事低調,二人嘅Ig雖未有貼合照,但已認定對方,佢哋今年3月15號已喺灣仔君悅酒店低調搞咗訂婚派對,已計劃等BB出世後結婚。

娛聞樂陪你走遍全球追星,即Like「娛果」FB 專頁!
BannerBanner