【集齊四條Q】張新悅被囡囡話悶餅 唔擔心青春期難教

更新時間 (HKT): 2018.05.12 00:00

41歲嘅楊張新悅(Nicola),07年嫁前教育局政治助理,現職區議員嘅楊哲安,09年誕下大女Lucy,再於10年及14年誕下次女Lily及孻女Leah,成為三女之母。一直表示「封肚」嘅佢,今年1月,忽然孖老公及三位寶貝女拍片,以「一不小心」為題,宣布楊家將再添一員,更於上月透露腹中肉同樣係B女,集齊「4條Q」!

7月便是預產期,「卸貨」在即嘅Nicola,日前攜三愛女到公園玩兼接受《蘋果》專訪,說到佢盡心盡力照顧三個囡囡嘅同時,囡囡亦令佢不斷成長,更一度感觸流下開心淚。佢一邊拭淚一邊話:「個天好錫我,畀咗機會我做媽咪,做咗媽咪之後,有好多冇諗到自己做到嘅嘢都做到,有時覺得自己做媽咪好辛苦,有時覺得好偉大,有時覺自己好渣,但我都覺得個天係挑戰我。」

講到第四胎同樣陀B女,身邊朋友都以為佢會失望,Nicola表明佢同老公都無呢個諗法,三個女就更加開心到飛起。佢話:「大女同二女好好笑,佢話我本來係生仔,因為佢哋同天主祈求,所以變咗生女,仲話如果生仔嘅話,細佬唔可以入佢哋間房,見到佢哋姊妹情好深,真係好開心,可能我係獨女,無試過呢種感覺。」

一屋女人,問佢同老公楊哲安喺屋企扮演嘅角色,Nicola笑住話:「佢(老公)成日玩,自己就好認真,女會覺得我係悶餅,玩就係爸爸!」不過,大女Lucy同二女Lily聽到媽咪這番話,即插嘴話覺得爸爸惡啲,Nicola就幫老公解話,話佢只係有威嚴。

問佢怕唔怕囡囡步入青春期會反叛難教?Nicola望住喺佢身後不斷打側手翻嘅大女,然後笑住話唔太擔心:「通常反叛係有啲嘢佢想做我唔畀,但我通常反問係咪真係要做,如你要做我就畀你去,但通常分析完佢哋都選啱。我唯一堅持係瞓覺,至於其他嘢,好似你要唔食飯都可以,但你嗰日就自己捱餓!」佢又話三個囡囡有唔同性格,大女已經識得生性,二女就搵緊自己想點,細女就一定係被竉壞嗰個。

Nicola又話自己一定唔係虎媽,仲話次女Lily試過測驗得62分,唔敢畀佢簽測驗卷,佢就教囡囡無論幾多分都要畀媽咪睇,大家一齊睇下乜嘢原因,唔好隱瞞,而且喺佢心目中,都唔覺得62分係好差。Nicola認為:「其實分數係其次,反而媽咪一定要教佢哋點去處理事情,有人話三歲定八十,但我覺得可以改變,當然到佢長大,拍拖生仔佢自己決定,o依家係少少嘅訓練。」

娛聞樂陪你走遍全球追星,即Like「娛果」FB 專頁!
BannerBanner