【開口夾着脷】大陸男粉絲自稱「蔡依林弟弟」 周董用5個字神回

更新時間 (HKT): 2018.05.14 15:14
周杰倫已婚兼有一子一女,但仍經常與蔡依林名字拉在一起。(網絡圖片)

周杰倫同老婆昆凌結婚3年糖黐豆,仲生咗一子一女湊夠「好」字,不過佢同蔡依林嘅一段陳年舊情,依然被提足咁多年唔斷氣,前晚周董喺長沙做《地表最強2》巡唱,就有大陸男觀眾「唔生性」,竟然自稱係「蔡依林弟弟」,好在周董反應夠快,用五個字神回。

當時係觀眾點唱環節,周董揀咗一位熱情男粉絲,問佢叫甚麼名字?點知呢位粉絲開口夾着脷:「我是蔡依林的弟弟」,幸而周董好有風度,仲拍手大笑畀反應,之後用五個字神回:「他蠻幽默的!」全場爆笑。呢條周董被玩片喺網上瘋傳,粉絲留言狂插「蔡依林弟弟」:「為甚麼演唱會非要提蔡依林」、「粉絲也放過他們兩個吧,都多長時間的事了!」

事業愛情都美滿,做咗人生贏家嘅周董,不時喺網上晒恩愛,好似噚日昆凌貼整母親節蛋糕相,寵妻狂魔周董就留言冧老婆:「真是太厲害了,祝大家母親節快樂喔!」

娛聞樂陪你走遍全球追星,即Like「娛果」FB 專頁!
BannerBanner