【《東方華爾街》】被張孝全拖住喺街市穿插 蔡潔:嗰一刻真係好浪漫

更新時間 (HKT): 2018.05.14 07:00

蔡潔今次喺《東方華爾街》裡面,除咗同吳鎮宇、張孝全有對手戲之外,佢仲同張可頤飾演母女,張孝全仲會周旋喺可頤同蔡潔之間,佢會喺學生時代同可頤有一段姊弟戀,直到踏入政壇,又會同蔡潔有一段曖昧情。

日前蔡潔接受《蘋果》訪問,佢話:「我喺劇中嘅角色係愛恨分明,不過對愛情嘅態度只係可以遠觀,好多嘢都係想做但係又唔敢做,最後為復仇放棄愛情,大家都抑壓對對方嘅感情,不過好可惜同張可頤冇對手戲。」

如果喺現實生活中,佢鍾意嘅男人,曾經鍾意過自己嘅媽,唔知會點處理?蔡潔話:「呢個問題真係好難答,以我嘅性格嚟,如果我好愛佢,我一定可以俾到幸福佢,不過如果對手係自己個阿媽,對唔住呀,我係孝女嚟㗎。」

張孝全喺唔少女仕心目中嘅男神,不過蔡潔話:「我哋喺4年前已經認識,嗰陣覺得佢係一個好慢熱嘅人,不過一熟咗就好多嘢講,係一個好陽光型嘅男人,慢慢我哋變咗做朋友,所以今次相處得好開心!」蔡潔仲搞笑話:「佢係國民老公,又係好多人嘅男神,我唔敢同其他人爭呀!」

講到合作嘅難忘事,蔡潔話:「有一場戲話我哋要逃亡,佢拖住我喺街市裡面左穿又插,成個環垃都好污糟,又有好多曱甴,不過張孝全盡量左閃右避,嗰一刻真係好浪漫,仲覺得佢好man!」

採訪:唐琛悠

娛聞樂陪你走遍全球追星,即Like「娛果」FB 專頁!
BannerBanner