【老婆生日】梁漢文送海膽蛋糕陪許願:最緊要佢身體健康

更新時間 (HKT): 2018.05.16 16:10

梁漢文(梁炳)出名錫老婆,佢同老婆林文慧(Karen)拍拖10年,2008年12月結婚,數數手指咁就10年喇!

噚日係Karen生日,梁炳每年幫老婆搞生日會,今年帶老婆食日本菜,仲用海膽整成一個生日蛋糕咁送俾老婆,明顯鍾意食海膽嘅Karen,見到呢個咁特別嘅蛋糕,即刻開心到拍晒手掌。

不過,梁炳同時抵死咁開咗個post,貼咗早幾年佢同老婆慶祝生日,被迫將Hello Kitty壽包冚頭嘅相,然後話「我老闆生日,今年打死我都唔會再逼到我帶呢頂咁Q可愛嘅帽」,Eric Kwok隨即留言笑佢:「Haha咁下年啦」。

《蘋果》揾過梁炳,問今年送咗咩俾老婆做生日禮物?佢笑笑口話冇乜特別,但趁老婆生日,佢自己許咗個願,梁炳話:「最緊要佢身體健康,簡單生活,可以一齊做運動,咁就得喇!」之後梁炳又話:「不過佢o依家身體都好好喇,最緊要錫自己多啲,因為錫自己先會健康,可以照顧埋其他人。」

梁炳一向緊張老婆健康,Karen於2012年發現患乳癌,當年梁炳為免令老婆增加壓力,完全密冚消息,獨自承受壓力,陪老婆抗癌,至5年後復發高危期過咗,梁炳先鬆一口氣,到o依家都成日陪老婆做運動,keep住身體健康。

娛聞樂陪你走遍全球追星,即Like「娛果」FB 專頁!
BannerBanner