【愛女百日宴】55歲做老竇 錢國偉上半場已醉

更新時間 (HKT): 2018.06.16 21:25

今年55歲導演錢國偉(Wilson),同老婆陳宛蔚喺2015年結婚,今年2月陳宛蔚為老公Wilson生咗囡囡Abby,噚晚佢哋係尖沙嘴洲際酒店為囡囡擺百宴,Wilson好多老友都有出席,包括譚玉瑛、鄭伊健、黃智賢、黎芷珊、謝天華、阮兆祥、側田、湯盈盈、姚樂怡、方力申等等。

《蘋果》今日打畀Wilson,佢話:「我上半場已經冧咗不醒人事,太開心喇!好耐冇飲酒。噚晚好多老友都有嚟,擺咗14圍。」佢話囡囡英文名叫Abby,問嚟緊第一個父親節感受點,佢話:「心情係要努力工作,搵多啲奶粉錢。」

噚晚錢國偉一早冧咗,自然辛苦晒老婆兼人母陳宛蔚,佢接受本報電話訪問時話:「囡囡唔難湊呀,噚日佢都好乖,由頭帶到尾都冇乜喊過,好多人抱都冇喊,好攰都冇乜嘈。同賓客影相影到夜晚,我都好安慰。Daddy(Wilson)好開心啦,開心到不得了,好快飲醉咗酒,所以要待佢招呼客人。」

陳宛蔚又話:「Wilson話好多謝朋友抽空出席,我哋請咗好多朋友,電影人、兒童組、伊健、小春、祖藍,天使等,太開心,所以佢好早就醉咗瞓喺度。係BB代佢招呼人客,佢好興奮,惟有我抱住佢影相,Wilson瞓覺,所以好搞笑,大家都好盡慶。」

娛聞樂陪你走遍全球追星,即Like「娛果」FB 專頁!
BannerBanner