【觀眾唔同】唔怕世界盃搶收視 姚子羚:有口碑自然有人追

更新時間 (HKT): 2018.06.25 19:06
攝影:林賓尼

姚子羚、模特兒Lea T.今日喺尖沙嘴出席理大內衣時裝展2018,同場仲有達利國際集團執行董事林知譽。

以嘉賓身份現身嘅姚子羚,被問到能否接受行內衣騷?佢表示要交畀公司決定。睇酬勞接工作?佢話:「唔係,大前題要靚,我嘅尺度係接受到,只要形象係健康嘅性感。」至於鍾意咩內衣款色?佢就覺得黑色夠經典、優雅,喱士可令女性性感加分。push up款色呢?佢話:「自然就ok,唔使刻意,有啲衫push up會唔好睇,就咁一個乳貼都可以。」

對於《天命》同《宮心計2之深宮計》同屬宮廷劇,姚子羚表示唔怕有比較。提到世界盃影響無綫黃金時段收視,佢話:「唔怕,有啲時段唔係重疊,而且係兩批人,鍾意睇劇就會去追,如果有口碑、好製作,自然有人追睇,所以我對收視有信心。」

Lea T.指自己雖然係時裝模特兒,但好多人都搵佢行內衣騷同泳衣騷,佢話:「我不是投訴,我好享受。」問佢鍾唔鍾意理大學生嘅作品?Lea T.話:「好靚,好有才華,我很似幸運公主。」

Lea T.指自己鍾意喱士,但唔需要push up,因為佢覺得自己冇咁嘅需要,佢話:「我覺得喱士比較女性化,我亦都喜歡運動型內衣。」會唔會自己設計內衣?Lea T.笑指自己畫畫好差。

此外,同林芊妤拍過拖嘅林知譽,被問到對方現時懷有身孕,林知譽話:「冇留意,唔清楚。(會唔會恭喜佢?)我冇睇過新聞,我哋冇聯絡。」

娛聞樂陪你走遍全球追星,即Like「娛果」FB 專頁!
BannerBanner