【世界盃再挫無綫】 138萬人次收看英格蘭 ViuTV創開台最高收視

更新時間 (HKT): 2018.06.25 12:38

噚晚世界盃分組賽,有港人至愛,受熱捧嘅英格蘭出戰巴拿馬,結果英格蘭大勝巴拿馬6:1,成功出線16強。呢場波球迷睇到好興奮,事關開波無耐就有入球,咁精彩嘅一場球賽,收視點會低。

呢場英格蘭出戰巴拿馬戲碼,噚晚8點喺ViuTV有得睇,據知呢場直播,亦創下ViuTV直播世界盃最高收視,平均有17點,約111萬觀眾人次,最高更有21點,據知更創下ViuTV開台以來最高收視紀錄,收看人次約138萬觀眾。至於對上嘅星期五,晚上8點,ViuTV直播巴西對戰哥斯達黎加,平均收視有13點,最高17點。去到星期六嘅一場,南韓出戰墨西哥,平均收視12點,最高15點。

無綫嘅收視,據《蘋果》了解同時段播出嘅《學是學非》、《冒險王衛斯理之藍血人》,《學是學非》為第六輯嘅首集,平均12點,約79萬人次,對比之前嘅節目《北海道攻略》,下跌3點;《冒險王衛斯理之藍血人》平均10點,約66萬人次收看,對比上星期下跌兩點。另星期六晚11點ViuTV直播南韓對墨西哥,無綫《勁歌金曲》平均5點收視,33萬觀眾人次,之後11點半播嘅《晚間新聞》,平均4點收視,約26萬觀眾人次。

另外,ViuTV於今午正式公佈收視中指出,有超過5成香港觀眾,即超過353萬觀眾,曾於家中收看首15場免費由ViuTV直播嘅18年世界盃分組賽事,而該數字1則未包括不在家收看及透過網絡平台收看嘅人士。而ViuTV網絡平台串流收看量自今屆世界盃開鑼以來共錄得超過330萬。

至於噚日英格蘭對巴拿馬嘅賽事,平均收視有17點,最高為21點,估計該場賽事嘅平均收視率高於上屆世界盃任何一場賽事嘅平均收視率。

娛聞樂陪你走遍全球追星,即Like「娛果」FB 專頁!
BannerBanner