【劇透慎入】「香港嘅核心價值就係冇價值」 子華借題發揮:面斥不雅

更新時間 (HKT): 2018.07.06 22:38
(攝影:沈健程)

講到香港最美好的黃金時代,子華說:「最重要關頭,講咗成晚,你睇下,香港幾好都有,其實又幾衰都有。就係喺咁樣嘅磨合裡面,我認為嘅香港嘅核心價值出咗嚟,呢個核心價值,就係冇價值。呢個核心價值係四個字。當你哋喺香港大街小巷,你會黑紙白字見到『發財埋邊』,no no no呢四個字係中文字,但喺喺中文世界裏,只有香港會咁用呢四個字,100% made in HK,開估,『面斥不雅』。」

「有冇人係唔知呢句說話係點解嘅,拍吓手,(觀眾拍手同笑),呢啲咪面斥不雅囉!(觀眾再拍手)仲喺度拍手,係都要人當面鬧你,面斥你,你話幾不雅呢!點解不雅,要講到明點解不雅就不雅0架啦,係咪?」

「當然你係唔使去到大街小巷,你去到茶餐廳,你見到人哋寫坐:『座位有限,面斥不雅』,你識做嘛,你係唔使人寫到明:『唔夠人數唔好坐』,『兩個唔好扮四個』(觀眾哄堂大笑),你唔使㗎嘛!自己人數自己計,自己香港自己廢,你係唔使0架嘛!人哋老闆又識做,見到喂你一kai蘿柚都坐咗兩個位,冇叫你走啦,你咪自己識做,叫多個B餐,你一kai要食好多餐,係咪先?」

「你去圖書館又會見到『圖書館範圍,面斥不雅』,乜嘢意思呀?你可以媾女,你帶本書吖,你唔好帶罐生力入去吖,你帶本書,唔使吓吓帶本biology咁直接,更加唔好biology裡面攝本《姊妹》,《姊妹》本身已攝咗好多biology喺裡面!好多人係唔知我講緊乜,鬼叫你出世出得遲呀!(全場歡呼)」

娛聞樂陪你走遍全球追星,即Like「娛果」FB 專頁!
BannerBanner