【李澤楷舊愛與新歡】梁洛施復工專人服侍 郭嘉文靚相晒命「開工嚕」

更新時間 (HKT): 2018.07.08 17:43

梁洛施(Isbella)同「小小超」李澤楷分手後,兩人共同撫養嘅3名兒子:9歲長治、8歲孖仔長亨和長軒日漸長大,Isabella決定復出幕前,噚晚佢喺ig貼整頭化妝相,留言:「工作ing」,相中嘅Isabella着住白色裕袍,有專人服侍整頭化妝扮靚,鏡中反映嘅佢露出自信笑容,幹勁十足。

上月Angelababy經理人Kim宣佈,以個人名義同Isabella合作,新計劃包括拍戲。今日《蘋果》致電向Kim了解Isabella開工詳情,Kim卻好口密:「工作性質遲啲公佈,暫時要保持神秘。」不過,網民都紛紛留言叫加油,連鄭秀文(Sammi)都為Isabella打氣:「新開始。掂!勁!正!」原來兩人私下交情甚篤,09年Isabella為李澤楷誕下大仔長治,翌年產後首度現身,就係到紅館欣賞Sammi尾場演唱會。

至於李澤楷嘅新歡前港姐郭嘉文,自從升呢做「楷女郎」同無綫約後,無工一身輕,經常陪小小超四圍去享受人生,不過上月24日,郭嘉文喺ig貼相留言晒命:「有沒有一種感覺,只要穿上美美的裙子旅行,心情都會變得晴朗,真正享受每分每秒。」但卻又hashtag「#謝謝親」、「#開工嚕」,唔知佢嘅「開工」係乜工作呢!

娛聞樂陪你走遍全球追星,即Like「娛果」FB 專頁!
BannerBanner