【繼承父業】從小被培養演藝興趣 湯鎮業孖仔跟甄子丹闖娛圈

更新時間 (HKT): 2018.07.09 00:00

相差兩分鐘出世嘅大孖湯君慈(Bruce)同細孖湯君耀(Chris),兩兄弟心有靈犀,同樣愛打籃球,孖仔生得同爸爸湯鎮業餅印一樣,佢哋受爹哋影響,決心繼承衣缽,已簽約甄子丹旗下,即獲安排參演電影《大師兄》,23歲嘅Bruce同Chris驟眼望去,好有爸爸當年五虎出道嘅影子。

大孖Bruce同細孖Chris都擁有陽光男孩氣質,訪問當日,兩兄弟喺北角打籃球,Chris進取強攻,連入多球,Bruce雖技不如弟,但佢擅玩花式,轉籃球手到拿來,兄弟各有強項。

孖仔自幼到片場探班,耳濡目染,所以佢哋美國讀大學都一齊副修電影,畢業回港就闖娛圈,大孖Bruce話:「拍戲呢個興趣,由細培養到大。」細孖Chris也話:「爸爸對我影響好大,佢好想我哋入行拍戲,慢慢都產生咗興趣。」細孖Chris話爸爸湯鎮業喺佢哋讀中學時,已鼓勵佢哋參加學校舞台劇演出,「爸爸仲會去學校,問可唔可以畀我哋加入,叫老師畀我哋試,點都要我哋有表演經驗。」估唔到湯鎮業咁望子成龍,兩子闖影圈,並視父親做目標。

年長孖仔僅一年胞姊湯愛嘉就冇興趣做幕前,佢選修電影做幕後,三姊弟唔排除將來姊弟檔開工。兩兄弟想改善演技,佢哋聽爸爸講得閒就睇戲,大孖Bruce話:「乜類型嘅戲都要睇,爸爸話好差嘅都要睇,年青人又要睇多啲年青人嘅戲,又睇吓o依家market啲戲。我發覺演戲眼神好緊要,爸爸好勁,好凌厲。」

講番兄弟情,大孖Bruce爆料佢哋由大細打到大:「細個會為小事嗌交,打遊戲機、爭玩具都會打交,記得中五嗰年,16歲,我哋打籃球時嗌起交嚟。」大孖Bruce火遮眼,一拳打去細孖Chris個鼻度:「嗰次我打歪咗佢個鼻,大個啲力唔同咗。」細孖Chris鼻骨歪咗要做手術,不過呢次教訓好大,大孖Bruce話:「打完交,細佬有嬲咗我,但嗰次之後,我哋冇再打交,大家都成熟咗,感情亦好咗。我嗰晚成晚瞓唔着,有喊,好內疚,未試過打到咁嚴重,我第日買早餐去醫院畀細佬食,爸爸同媽咪有鬧我,嗰刻我學識咗要珍惜細佬,同佢嗰次後感情比以前仲好。」

細孖Chris補充:「嗰刻好嬲哥哥,我畀佢打到鼻骨彎咗,要入院做手術,哥哥有嚟睇我,知佢對唔住,內疚買嘢畀我食,我都原諒咗佢。爸爸有鬧佢,仲話佢『點解屋企人打自己人,要打就打出邊啲人,唔好打自己人』。」細孖Chris嬲咗哥哥一晚,兩兄弟和好如初。o依家越大,反而越會互相關心,兩兄弟一齊住,有時會一齊睇戲傾演技,咁會唔會一齊飲番杯啤酒?細孖Chris答:「冇咁『麻甩』。」要佢哋互數對方缺點,細孖Chris即話:「哥哥易發脾氣。」大孖就篤爆細孖Bruce懶執屋,愛hea爆打機。

無論大孖Bruce,或者細孖Chris,佢哋都sell自己係陽光男,所以選擇角色,怕唔怕兩兄弟爭飯碗,細孖Chris答:「一齊發展OK。」大孖Bruce再話:「我希望嘗試唔同路線,唔想被人定格,想可塑性高啲,好人、壞人有機會都想試吓演出,或者細佬做壞人,我做好人。」不如兄弟玩「兵捉賊」,細孖Chris叫好。兩兄弟剛入影圈,卻執到好籌跟「宇宙最強」甄子丹搵食,又有星級爸爸湯鎮業背後支持,大孖Bruce話:「我哋開始賺錢,唔使爸爸再畀零用錢,已cut咗佢畀嘅信用卡,我哋基本開支應付到,下個目標希望養到爸爸。不過我哋仲住爸爸租間屋,其他使費自己搞掂。」

娛聞樂陪你走遍全球追星,即Like「娛果」FB 專頁!
BannerBanner