【撼贏無綫黃金收視】ViuTV直播世盃八強賽事 138萬觀眾睇住英格蘭入四強

更新時間 (HKT): 2018.07.09 12:04
(資料圖片)

英格蘭前晚喺俄羅斯世界盃半準決賽以2:0贏咗瑞典,成功躋身4強,今次亦係英格蘭28年來首次踢入世盃準決賽。

英格蘭一向受港人熱捧,免費電視ViuTV前晚10點直播英格蘭對瑞典呢場重要賽事,當然受到全港球迷關心,據了解,呢場賽事平均收18點,有118萬人次,最高係21點,有138萬人次,比上次ViuTV直播英格蘭狂炒巴拿馬嗰場分組賽成績重好。

至於無綫方面,據了解星期六晚9點半至10點半播《美女廚房》平均12點(79萬人次),跌咗5點、10點半至11點《3日2夜》平均6點(39萬人次),跌咗7點、11點至11點半《勁歌金曲》平均3點(20萬人次),跌咗4點,而11點半至11點45分播《晚間新間》平均只有2點(13萬人次),跌咗5點。

之前ViuTV直播英格蘭狂炒巴拿馬6:1嗰場分組賽,已經創下ViuTV開台兩年以來最高20.5點收視,有134萬人次收睇,平均收視就有17.4點(114萬人次),仲令到ViuTV首次喺黃金時段撼贏無綫㖭。當晚《學是學非》平均只得12點(約79萬人次),對比之前節目跌咗3點,而緊接《學是學非》嘅《冒險王衛斯理之藍血人》平均10點(約66萬人次),比之前跌咗2點,而呢次亦係無綫自從2001年黃金時段輸過畀亞視嘅《名人慈善百萬Show》之後,17年來再次敗仗。當年《百萬Show》平均收視30點,而對撼嘅港姐決賽就只得平均21點,當年楊思琦攞冠軍,創下歷史新低港姐收視。

娛聞樂陪你走遍全球追星,即Like「娛果」FB 專頁!
BannerBanner