【相差5歲】鄧麗欣甜笑認拍拖 男友王子開腔保護姊弟戀

更新時間 (HKT): 2018.07.15 14:54

4月一齊旅行,當時係咪已經拍拖?Stephy甜笑指:「係囉,畀啲空間我哋去發展。」問佢同王子點樣遇上?佢話:「我哋識咗好多年,因為係同一間公司,不過以前唔熟。」咩位令佢哋熟?佢笑指係應采兒(丁丁)咁啱約大家食飯,佢笑言唔知丁丁算唔算叫做媒人。

講到今次係姊弟戀,Stephy話:「我冇諗太多,2018年喇,大家對所有嘢嘅接受能力都好高。」港台兩地,平時係咪以視像見面?佢表示希望大家畀啲空間佢。講到佢個樣好sweet,Stephy即刻話:「係好wet,因為落緊雨。」王子有冇恭喜佢攞獎?佢話:「有,但佢好忙,未有慶祝。」最後,記者向佢道賀,Stephy面紅紅笑住話:「多謝!突然好熱添!」

另外,王子今日亦都親自向台灣傳媒回應戀情話:「謝謝大家!也請大家給我們一些空間相處。」

講到Stephy早前憑電影《空手道》獲第17屆紐約亞洲電影節(New York Asian Film Festival)奪得亞洲新秀獎,佢好開心咁話:「好開心,第一次衝出亞洲,感覺好唔一樣,好緊張,因為係一個陌生嘅地方,第一個香港演員攞呢個獎,意義重大。」

提到杜汶澤笑問佢攞完獎未?Stephy話:「希望未,可以繼續攞,佢都開心,我哋有約食飯,但唔知邊個請呢,佢千叮萬囑叫我小心個獎,因為佢上次整爛咗個奬,其實呢個獎都好重,所以我都好小心拎返嚟,我好開心,當地都好鍾意呢部戲,佢哋評價係叫我有唔同嘅嘗試,希望我打入荷李活。」講到佢用英文致辭,佢表示在場人士都係外國人,要尊重大會,所以要準備充足。

娛聞樂陪你走遍全球追星,即Like「娛果」FB 專頁!
BannerBanner