【俾咗幾千萬朋友】退休26年醫院偷練畫 阮大勇:仲想有突破

更新時間 (HKT): 2018.07.19 21:45
攝影:羅慧敏

阮大勇今日喺書展為自傳《一代畫師──阮大勇》舉行「阮大勇漫畫港情」座談會,席上對談還有香港動畫界前輩、也是資深動畫師盧子英老師。盧Sir話自己都曾經畫過一張電影海報,當時製作單位嘅要求係要「阮大勇風格」。今日盧Sir講返出嚟,大家都不禁笑了,識英雄重英雄。

阮老師喺講座分享生平同佢嘅畫家人生,現年77歲嘅阮老師話51歲已經退休,佢話:「我好幸運,因為自己係個冇計劃嘅人,當時喺紐西蘭,要服侍爸爸媽媽,已經唔想畫嘢,o依家又變番日日都想畫嘢,啱啱入咗醫院一星期,喺醫院都畫畫,仲要避開護士偷偷摸摸咁畫,所以畫得好快,覺得更加生動,所以我仲想有突破,o依家77歲,思想同30、40歲嘅人冇分別,希望一路畫落去。」

講到照顧屋企,阮老師就話自己糊裏糊塗過咗幾十年,亦好慚愧冇好好照顧一對仔女,個女有畫畫天份,但都唔會迫個女去畫。現場有人問到阮老師人生裏面有冇挫折同遺憾?佢諗咗一陣先話:「我打工好順利,唯一係心儀嘅女仔追唔到啦,我生活要求唔高,挫折唔大,要求低,挫折少。」而講到遺憾,阮老師就話:「當年同朋友夾份買咗幅價值3萬蚊嘅李可染畫,諗住放喺屋企,點知屋企嘅位置掛咗要行到去廚房先欣賞到,最後我收咗朋友萬五蚊畀咗佢,o依家幅畫值幾千萬,呢個係我最大遺憾。」

阮老師有一個豐富嘅畫家人生,但佢就話:「自己唔係一個奮鬥人生,呢幾年咁多人接受同喜歡,好似發夢咁,今次第一次出自傳,已經冇憾。」阮老師已經再婚,佢話o依家忙裝修屋企,仲話:「生活係有所改變嘅,太太後生過我好多,佢鍾意旅行,我哋冇乜代溝,我仲好幼稚架。」

娛聞樂陪你走遍全球追星,即Like「娛果」FB 專頁!
BannerBanner