【質素幾平均】落選港姐都參加 ViuTV《廣告女皇》過千人報名

更新時間 (HKT): 2018.08.05 17:10
攝影:陳俊強

ViuTV繼《Good Night Show全民造星》選男神之後,再舉行《Good Night Show廣告女皇》選囡囡,今日佢哋喺柴灣進行面試,監製楊任豪話收到過千份表格,呢3日會見大約300位面試者,而今日就見21個。有乜準則?楊任豪話:「要樣靚,同埋要有自己諗法,唔會好似選美得一個模式角度,今次有真人騷成份喺入面,最終會揀20個入圍,用3個月時間去打造廣告女皇。」

今日面試有兩位係落選港姐,會唔會面對鏡頭好啲?楊任豪就話:「最主要睇吓夠唔夠fresh。」監製話依家搵緊星級導師:「例如倪晨曦,佢做KOL做得好成功。」講到落選港姐21歲范莎莎同22歲陳曉婷,范莎莎係今年落選港姐,陳曉婷就係2016年落選港姐,佢哋兩個一齊接受傳媒訪問時話大家見面一拍即合,但當時大家都唔知對方係落選港姐,范莎莎話:「我唔講係怕得罪人,但我哋兩個都好想入行,見今次《廣告女皇》,所以好想用正途入行。」陳曉婷就話自己想拍廣告,覺得自己優勝之處係冇偶像包袱:「可以醜化自己,唔化妝都可以開live。」

今日21個女仔,除咗兩個落選港姐之外,仲有大台兒童節目《Think Big天地》主持李雯希、跳唱組合《星座少女》3位成員黃寶瑤、李善敏同易佩詩。講到21個女仔質素幾平均,但李雯希比較大份,其他比較細粒,而大部份女仔都曾經拍過廣告。其中張敏潔望落有啲似Stephy鄧麗欣,佢話:「都有人話我似,不過亦有人話我似2R嘅Race同張栢芝。」張敏潔拍過安信兄弟、同劉青雲拍過念慈菴廣告,又拍過陳慧琳《做自己的太陽》MV。

娛聞樂陪你走遍全球追星,即Like「娛果」FB 專頁!
BannerBanner