【唔慣拍檔着泳衣】同36F日本女星跳彈床 陳柏宇:盡可能望高少少

更新時間 (HKT): 2018.08.19 20:45

陳柏宇同日本女團「夢見青春期」四位女成員今日一齊現身灣仔美食展,佢哋早前為道地飲品拍攝一個廣告,片段中見到女團成員京佳穿着泳衣同陳柏宇一齊跳彈床,頗多性感鏡頭,今日喺現場佢哋一齊炮製夏日飲品同大家分享。

陳柏宇同36F京佳性感合作,今日大家穿上便服現身,佢笑住話:「廣告六月拍,唔算好耐冇見,不過今日佢有着衫囉,咪好囉,唔好冷親。」拍攝時大飽眼福?陳柏宇話:「冇㗎,其實好尷尬,尤其我最尷尬,大家溝通唔到,如果有共同一種語言可以傾偈溝通就會好啲,佢又好習慣着住泳衣工作,我就好唔習慣同着住泳衣拍檔工作,期間只係能夠簡單英語溝通。」陳柏宇坦言唔敢正視京佳,稱只係望對方個樣,盡可能望高少少。

陳柏宇七月時聲帶出血,之後仲要到內地開show,佢話暫時已經好返好多,遇到呢種情況做演唱會,開啟了另一種唱現場方法,都有所得著。

娛聞樂陪你走遍全球追星,即Like「娛果」FB 專頁!
BannerBanner