【TVB 8傳下月摺埋】無綫普通話翡翠台 開台半年玩完

更新時間 (HKT): 2018.08.22 12:39

無綫喺6月開始進行瘦身行動,先喺TVBI開刀裁減60人,之後再解散體育組,跟住又傳出配音組大規模裁員。未幾再有消息稱無綫16廠將會結束運作,相關員工約20至30人會被裁。

連番「瘦身」行動,有指主要原因係無綫近年生意額大減,所以各部門都要「交人」,消息稱目標由4,100人,裁至3,300(新聞連結: https://bit.ly/2PuwUYA )。

雖然近日似乎冇乜裁員消息再傳出,但正如當日無綫回覆傳媒所講,有個別部門需要重組或整合,好似今年港姐嘅外景拍攝一於慳得就慳,主力喺香港嘅景點拍外景。至於另甚至喺今年3月先成立嘅海外頻道普通話翡翠台以及TVB電台,分別會喺加拿大太平洋標準時間8月27日,其他地區會喺香港時間9月1日停播。

呢個普通話翡翠台,主要係喺網上收費平台,用普通話廣播兼配上簡體字幕,除咗新聞報道之外,仲有劇集同綜藝節目,不過都係配上普通話。此「普通話翡翠台」主要服務對象既然係屬於海外頻道,當然唔係香港人,佢係透過TVB Anywhere平台播出,估唔到成立不足半年就玩完。

據知呢個「整合」行動依然繼續,TVB8、TVB星河網站將會喺9月停止服務,與及myTV Super有個別頻道亦要摺埋,好似TVB體育台、直播新聞台同TVB旅遊台。

娛聞樂陪你走遍全球追星,即Like「娛果」FB 專頁!
BannerBanner