【兄長捐椅畀歌迷會】陳百強60歲冥壽 老父輪椅代步出席

更新時間 (HKT): 2018.09.08 20:32

噚日(7日)係陳百強(Danny)60歲嘅冥壽,今日喺北角一間酒店舉行「永恒的愛六十載.至愛陳百強誕辰薈」,大約250名「紫迷」到場參與,陳父陳鵬飛都有現身,一身藍色西裝,以輪椅代步,精神不錯,還在Backdrop簽名留念。至於Danny嘅大哥陳百靈,同家姐亦有現身,而林慕德、陳寶珠、陳欣健等亦有出席。

現場以陳百強最愛嘅紫色佈置,門口位置放咗一個1:1嘅陳百強人形紙牌,唔少歌迷輪流合照,場刊亦是以紫色印刷,刊內有Danny生前同陳寶珠、何超瓊嘅合照,仲有童年照等等。

場內設有自助餐招呼歌迷,還有Q版陳百強畫像,螢幕播出一張又一張嘅陳百強照片,每枱亦擺咗不同時期推出的唱片封套,以及他生前曾經坐過嘅椅子。

Danny嘅哥哥陳百靈接受訪問時表示,因最近有唔少有關懷念Danny嘅報道,令佢勾起好多回憶︰「不知不覺就60歲啦,樣樣嘢都諗番起,Danny大部分嘅嘢都擺係台山嘅紀念館,嗰度有人打理,我只係收藏咗一、兩件。」至於現場擺設Danny曾坐過的凳,陳百靈稱︰「係我捐出嚟畀歌迷會,我覺得佢哋識得珍惜,好過擺喺我屋企。」

講到Danny身前嘅為人同點滴,陳百靈話︰「我呢個細佬個人好靜,當年自己有段時間唔喺香港,到我返嚟時佢紅咗,但係佢好少同屋企人傾心事,選擇搵朋友傾。」在Danny嘅歌曲中,陳百靈最喜歡《等》同《漣漪》︰「Danny演繹得好好,佢喺呢方面係有天份,好多嘢唔使點學都識,佢嘅聲線係遺傳父母。」

林慕德就表示,當年同Danny好好朋友,自己當年同前妻結婚都係搵Danny做戥穿石。談及對Danny最深刻回憶,他笑:「佢醉到阿媽都唔認得,當年佢成日話介紹女仔畀我,到我結婚前搞單身派對,大家都飲到好醉,佢第日同我講︰『好好玩呀,不過我撞車。』好彩好輕微,人冇受傷。Danny份人係好用心去做一件事。」音樂上,兩人互相切磋,互相尊重,佢話︰「我作咗首歌《不再問究竟》畀Danny,佢覺得好好聽,係我同佢一個好好嘅合作。」

陳家瑛曾於訪問中講過,Danny覺得後浪嚟得好快、又感到自己創作似已缺乏靈感,對此林慕德謂︰「Danny其實係一個好聰明嘅人,佢睇化咗好多嘢,但佢搵唔到自己想要嘅嘢,所以有壓力,因此而有唔開心。其實哥哥(張國榮)、梅姐(梅艷芳)同羅文都曾經試過係咁,大家都係超級感性嘅人。」

娛聞樂陪你走遍全球追星,即Like「娛果」FB 專頁!
BannerBanner