【多兄弟撐場】久違10年再開騷 鍾鎮濤:用歌曲分享故事

更新時間 (HKT): 2018.09.13 15:53
(攝影:仇志德)

相隔10年,B哥哥鍾鎮濤今日喺尖沙嘴舉行記招,宣佈11月24、25日再踏紅館開騷,正如騷名「鍾鎮濤故事繼續演唱會」一樣,B哥哥會用歌曲分享佢嘅故事。

記招上更首次獻唱歌曲《故事繼續》2018年改編版,唱之前B哥哥:「記得有年喺偉仔(梁朝偉)屋企開元旦party,我有少少唔開心,於是拉咗個朋友出去露台寫咗呢首歌,雖然我喺低潮,但係我副偈仍然好勁,首歌都係咁樣寫。」好友阮大勇老師更親臨,首次以速寫為B哥哥素描人像。

演唱會獲不少老友捧場,B哥哥笑指分飛重任交俾主辦,騷上會唱偉仔的《你是如此難以忘記》同張國榮的《由零開始》,問到會否邀請偉仔上台唱?佢話:「有邀請佢嚟睇,但係上台可能會好大壓力,好似我頭先第一次唱嗰首歌都會有壓力。」

至於溫拿必定上台玩,佢笑指擔心班兄弟唔肯走而超時,B哥哥笑話:「譚詠麟係老闆之一,只要佢俾錢,我就唱到12點都唔走。」愛女鍾懿同鍾幗都會上台,另外大仔大女亦會返港捧埸,B哥哥話:「個個都好錫鍾懿,只要有佢喺度,我就冇晒助手,個個都會走埋去佢身邊,所以今次我申請咗有個化妝,如果唔係到時連汗都冇人幫我印。」B哥又指十月初將閉關鍛煉體能,屆時有信心體力能應付唱幾埸,但紅館未有期,如果反應好再考慮會否開日場。

娛聞樂陪你走遍全球追星,即Like「娛果」FB 專頁!
BannerBanner