【入行25年】張崇基張崇德開終結演唱會 徒弟BabyJohn唔介意伴舞

更新時間 (HKT): 2018.09.27 18:12
攝影:羅慧敏

張崇德同張崇基今日喺銅鑼灣出席「新.生.日演唱會2018」發佈會,宣佈11月23同24日喺灣仔伊館舉行入行第9個演唱會,適逢兩兄弟入行25周年,佢哋仲宣佈推出黑膠唱片,佢哋話:「其實想做演唱會好耐,對上一次已經係16年前,今次係一個好好嘅終結,可以一齊做一件事,好值得開心。」

問到係咪真係唔會再開騷?崇德話:「真係好攰,大家鍾意呢樣嘢(音樂),遇到好多困難,但我哋都想守護住,冇人可以擔保。回顧番,有幾個樂師都離開咗,所以應該要珍惜每次表演,講嘅唔係悔氣說話,做埋呢次真係唔掂喎。」

今日蔡瀚億(BabyJohn)就以嘉賓身份現身,原來佢同崇基崇德係師徒關係,崇德教BabyJohn唱歌,崇基就教滑水,BabyJohn話師傅演唱會,做伴舞都可以。提到之前被影到老婆肚凸凸疑有喜,BabyJohn就話:「暫時全家好平安,無風無浪,順其自然啦!好多人都有畀意見,但老婆話真係要減肥,冇啖好食!佢話要用意志力一定要減。」問佢係咪怕小器唔講得?佢就話:「連平時冇乜搵嘅朋友都有搵我,啱啱中秋節搞party,啲人仲懷疑係咪有特別意思,大家諗太多啦!依家努力,都想好似崇德,一仔一女就功德圓滿,希望有呢個大禮物啦,多謝大家關心。」

娛聞樂陪你走遍全球追星,即Like「娛果」FB 專頁!
BannerBanner