【暗寸港姐假?】問答環節唔要交行貨 陳志雲:最緊要有自己想法

更新時間 (HKT): 2018.10.07 20:01
(攝影:林賓尼)

《2018亞洲小姐競選》香港賽區決賽,今晚喺大埔亞視總台舉行,評判團有陳志雲、陳欣健、陳嘉容、顧紀筠及梁佩瑚,其中陳志雲及梁佩瑚以前都係屬於無綫,而梁佩瑚更係1989年香港小姐嘅季軍。

問到梁佩瑚身為港姐,對選亞姐有乜準則,佢就話:「隔咗咁多十年,都唔同咗,但都係大方、得體為主,要睇吓佢哋上到台嘅表現,會喺問答環節度問吓佢哋一啲日常生活嘅喜好,不過都唔會留難佢哋。」而陳志雲則表示:「第一次同班女仔見面,都覺得佢哋伶牙俐齒,仲刁鑽過我。」梁佩瑚又話:「我哋以前着一件頭嘅泳衣,上到台都淨係識『係呀、係呀』咁。」而陳志雲則笑指自己若要着泳衣,會唔識講嘢。而佢更建議下年亞姐搞評判着泳衣,等其他人去問評判問題。

提到今晚,兩人亦異口同聲表示期待問答環節,而今日大會亦有提供問題俾佢哋,陳志雲指有時問問題,都要有高度技巧,又問梁佩瑚會唔會跟大會問題去問,兩人chit chat一輪後,問梁佩瑚期待佳麗會有乜答案時,佢就話:「要答得舒服唔好太假,例如我的志願係要為港爭光。」跟住陳志雲即笑言:「係呀,嗰啲我的志願係世界和平。」(留意番,港姐又真係經常出現「世界和平」呢樣嘢)之後梁佩瑚即插嘴:「點呀,你依家可以阻止人哋打仗咩?」而最後陳志雲就補充:「最緊要唔好係罐頭答案,要有自己想法。」

娛聞樂陪你走遍全球追星,即Like「娛果」FB 專頁!
BannerBanner