【住喺王子度?】到台灣冇租酒店 Stephy︰唔係同居係被人收留

更新時間 (HKT): 2018.10.11 17:22
左圖攝影:林賓尼

鄧麗欣(Stephy)及劉皓嵐(劉小華)今日去到荃灣出席國際培幼會「愛·女孩」鉛筆捐贈活動,Stephy早前同王子(邱勝翊)一齊去巴黎出席時裝周放閃,情侶檔一齊搲銀兼旅行。

Stephy強調二人不是旅行,此行逗留歐洲半個月,Stephy話:「第一次出埠感覺好想返屋企,經歷轉天氣好攰,唔習慣皮膚好乾,今次去咗米蘭、威尼斯,再去巴黎。」Stephy否認全程拍拖,佢話:「去到最後一站巴黎先見到,見到幾日,但就只係得一日(拍拖)時間。」問到Stephy與王子在巴黎有否浪漫事情,Stephy話:「巴黎已經係一個浪漫地方,都係行吓街。」

此行Stephy不幸喺佛羅倫斯被偷去電話,佢話:「當時喺餐廳入面,有人走埋嚟同我講嘢,我唔知佢講咩,擺喺枱上嘅電話轉眼就冇咗。」問到Stephy當時會否擔心與男友失聯,Stephy話:「當時助手喺身邊,都有同佢同屋企人報平安。」Stephy表示,佢同王子係一早分別獲邀出席巴黎時裝周活動,並非相約一齊接洽工作,對於將來是否接受情侶檔工作,持開放態度。

今個月15號35歲生日嘅Stephy,暫時未知點慶祝,亦唔諗咁多,希望越大失望越大,佢話:「14號仲要去台灣出席一個宣傳活動。」問到Stephy是否與王子同居,佢話:「唔係,同居咁大件事。」Stephy被追問到台灣有冇租酒店,Stephy好坦白話:「冇,我不嬲都好慳家,不過呢啲唔係同居,係被人收留。」

娛聞樂陪你走遍全球追星,即Like「娛果」FB 專頁!
BannerBanner