【孭住豪宅冇得停】落住雨開騷搵命搏 Dear Jane:買車用電池去搭電

更新時間 (HKT): 2018.10.11 14:30
攝影:卓寶花

Dear Jane、雷深如(J.Arie)、鄭世豪噚晚喺維園參與新城音樂騷,開騷前遇著落雨,擾攘一輪後先可以開始,但係佢哋都要喺傘下演出。Dear Jane話:「幾年前喺旺角行人專用區唱busking落大雨,都諗住取消,好多fans在場等,當時要接駁結他,都好危險,真係冒住電死去開騷。」

結果點?「我哋去咗深水埗問人,買咗啲車電池去搭電,唱到成身濕晒,個個擔遮聽歌好浪漫。」雖然噚晚觀眾不多,但Dear Jane唔覺掃興,仲話:「有得玩已經好開心,何況都停咗雨,我哋唔怕濕身。」

主音Tim早前同太太楊洛婷帶同囡囡Tanya返加拿大探親兼參加婚禮,Tim話:「感覺似放完長假,但已經去咗日本、澳門、北京做嘢,以為之前可以叉足電,反而消耗咗,好開心阿女行得犀利咗好多,可能嗰邊地方大。」現時孭住豪宅同一頭家,Tim自嘲冇樓冇家都要努力,依家係冇得停。

娛聞樂陪你走遍全球追星,即Like「娛果」FB 專頁!
BannerBanner