【女人錢唔易賺】佩服網上高手搵辛苦錢 灘叔:絕對係網購

更新時間 (HKT): 2018.10.26 16:25
攝影:仇志德

噚晚《翔揸劉灘之潮潮的吹》喺演藝學院舉行頭場,今次係彭浩翔、鄒凱光(灘叔)同劉翁首次同台演出,佢哋喺開場同觀眾打完招呼後,又各自喺台上棟篤笑,灘叔喺台上話:「近呢一、二年喺網上出現咗好多高手,好佩服佢哋,搵嘅係辛苦錢,因為要o氹女人開心,係一件唔容易嘅事,但係我最不值係啲人形容佢哋係網上騙徒。」

灘叔續話:「其實女人都會上網買衫,o依家只不過係上網買人o氹佢哋開心,呢個絕對係網購,呃乜嘢啫?女人係好精明,從來都唔會俾人哋呃,你有幾可見女人去買嘢會俾人呃?一個男人若果想俾女人去買,要當自己唔係一個人,當自己係一件貨,當然好多人係會先睇外表揀靚仔,不過亦有人睇內涵,好似我,才高八斗,精通五國語言,不過我只係講廣東話。」

講完網購,灘叔仲話有好多嘢已經喺香港消失咗:「以前嘅香港人係搵到錢,又洗到錢,大聲夾惡,不可一世,但係o依家錢又唔夠人多,洗又唔夠人多,聲又唔夠人大,又唔夠人哋無禮貌,重點係唔識周街痾屎痾尿,究竟香港人係咪last咗?香港人係一個形態,好似水咁吹出嚟,最叻係笠水,乜嘢文化都同水有關!」

娛聞樂陪你走遍全球追星,即Like「娛果」FB 專頁!
BannerBanner