【陸家俊,我哋支持你】跳出十年金融業 改名「DJ DRAGONBALL」玩電子跳舞音樂

更新時間 (HKT): 2018.10.26 00:00

陸家俊呢個名字就算你唔識,都總會聽過軟硬嘅《廣播道Fans殺人事件》曾唱過「陸家俊 我哋支持你」,又或者曾每日晏晝打開收音機,聽到少爺占以陸家俊命名角色嘅廣播劇。事實上陸家俊係90年代初,以15歲之齡加入樂壇出過唱片,及後曾拍過劇又做過幕後,消失幕前十幾年嘅佢日前喺上環接受《蘋果》訪問,談談近況同嚟緊嘅新搞作。

眼前嘅陸家俊身形微微發福,跟以前做歌手時一臉青澀成強烈對比﹕「我正式出道應該係十五歲嘅時候參加新秀開始,到19歲嘅時候有一次拍MV喺貨櫃上意外跌咗落嚟受傷,住咗兩個幾月醫院,好彩仲後生復原得快,之後我就去咗美國進修音樂,喺美國嘅時候除咗玩音樂平時冇嘢做就係睇返TVB嘅劇,睇睇吓好想試拍劇,於是又返嚟香港加入咗TVB做藝員。」家俊娓娓道出以前嘅入行經過。

回顧喺無綫嘅日子,家俊最記得有周潤發任導師教佢演戲,但後來家俊都係決定離開無綫重投音樂﹕「03、04年左右開始同朋友一齊搞錄音室幫歌手造歌,見證住成個唱片行業一路萎縮,唱片公司俾每首歌嘅Budget越來越少,講緊以前最好景時可以用幾十萬造一首歌,到我造嗰陣都有十萬八萬一首,到後來決定結束錄音室嘅時候,每首歌Budget跌倒得番兩、三萬,加上電腦化普及好多人喺自己屋企都可以做到,咁做咩要畀錢出嚟做呢?」

結束錄音室生意後陸家俊索性完全退出,專心替家人打理金融業生意長達十年,直到年前又俾佢碰上另一機遇,以另一種形式去延續佢嘅音樂夢﹕「年幾前開始我喺朋友介紹下首次接觸EDM(電子跳舞音樂),佢哋負責 國際DJ嘅Management事業,安排佢哋去世界各地表演,我跟佢哋去世界各地嘅EDM音樂節開眼界,親身感受到呢樣嘢喺國際上有幾受歡迎,於是就開始由零開始學習打碟同認識各樣DJ器材。」

由歌手轉做DJ嘅陸家俊仲取名「DJ DRAGONBALL」,佢承認因曾替「龍珠」唱過主題曲,於是先用呢個令人印象深刻嘅名,仲直言﹕「另一樣令人記得應該係軟硬,全靠佢哋隻歌到今時今日都有人記得,當然少爺占喺電台廣播劇度叫自己做陸家俊都係原因,有一段時間人哋以為我喺商台度返工。」咁有無嘗試過問軟硬或少爺占點解要用佢個名?佢笑言﹕「嗰時我得十六、七歲,軟硬已經係最紅嘅DJ,我邊夠膽行埋去問,少爺占都無問過,無所謂啦,問反而仲奇怪。」

最近無綫嘅節目「流行經典50年」,邀請過好多8、90年代嘅歌手亮相,勾起好多觀眾嘅回憶,繼早前蔡興麟亮相後,不少網民都相繼召喚陸家俊上節目,佢笑笑口地承認即將響應召喚﹕「其實個節目監製係我朋友,佢有搵我而我亦應承咗嚟緊12月會上,因為依家肥咗好多,畀多兩個月時間我練吓歌減吓肥先啦。」

家俊話自己目標要兩個月減40磅﹕「因為我為食,所以好易肥,最重試過240磅,但我好有經驗知道點減。」佢唔肯透露依家嘅磅數,淨係話﹕「我目標係減到150至160磅上鏡就差唔多啦。」

娛聞樂陪你走遍全球追星,即Like「娛果」FB 專頁!
BannerBanner