【室內抽煙當舞台煙火效果…】性感登場上陣 謝安琪明年紅館開騷

更新時間 (HKT): 2018.11.08 13:50
攝影:陳慧安

麥浚龍(Juno)、謝安琪(Kay)王雙駿同陳哲廬嘅拉闊音樂會,噚晚喺會展舉行,薛凱琪、周國賢、蘇永康同甘國亮等都有到場支持。音樂會以Juno同Kay喺新碟中嘅角色董折、浦銘心嘅故事做主題,二人以歌曲同片段講故仔,冇對白、冇講嘢,專心唱歌。

產後復出嘅Kay首次開騷,不乏低胸、露背同透Bra等性感演出,Juno就喺獨唱《念念不忘》嘅時候喺台上食煙,台下觀眾即起哄。

音樂會尾聲,仲有古天樂赤裸剃鬚嘅片段同歌聲做彩蛋,非常驚喜。謝幕時Juno同Kay多謝完樂隊之後,仲邀請俞琤現身,佢親自彈ukulele,為Juno同Kay合唱嘅《櫻吹雪》做伴奏,俞琤以讀白表示要借呢首歌向金庸致敬。

受訪時,Juno同Kay都表示向金庸致敬部分係俞琤提議,Juno話:「喺我哋綵排期間,俞琤話佢一直好鍾意《櫻吹雪》呢首歌,想藉此向金庸致敬,於是我哋就加插呢個部分。」

至於古仔嘅彩蛋片段,Juno解釋係今日將派台嘅新歌片段,不過就賣關子拒透露詳情。至於喺台上食煙,Juno話只係表演嘅情節,咁事前有冇申請會喺室內食煙?他稱:「呢個要問番大會喇,我有準備煙灰缸,揸住支煙唱歌係有難度0架。」商台公關部回應抽煙環節係舞台煙火效果,有關事宜會同場地處理。

而Kay全晚不乏性感演出,佢話有畀過相老公張繼聰同健身教練睇,仲話老公都有喺後台支持。問到佢哋有冇計劃喺紅館開騷?Juno透露已經申請緊,希望可以喺明年開騷:「但係我希望係Kay個人騷。」Kay話如果真係可以開騷,希望係喺凍啲嘅日子:「我鍾意凍啲嘅天氣,有種浪漫氣氛。」

娛聞樂陪你走遍全球追星,即Like「娛果」FB 專頁!
BannerBanner