【咁都冇貼身企?】否認俾鄭子邦摸大髀 湯洛雯辯稱係角度問題

更新時間 (HKT): 2018.11.25 16:11

「靚湯」湯洛雯今日喺太子出席活動,佢表示今年要單身過聖誕。對於早前有指靚湯喺銅鑼灣酒吧夜蒲嗰陣,同姚子羚前度男友「的士邦」鄭子邦形影不離,(相關新聞﹕ https://bit.ly/2PKITFj ),靚湯強調自己係宇宙無敵單身。問到鄭子邦係咪追佢?靚湯話:「唔係,報道唔係事實。」不過相中發現,靚湯任由鄭子邦下半身貼實自己之餘,仲畀佢摸埋大髀,靚湯解釋:「嗰日食完朋友生日飯,之後去咗莊思敏間酒吧坐咗一陣,我哋係一班人,有莊思明、龔嘉欣,啲相係完全角度問題,因為地方細,所以大家企得埋,好似貼住咁,其實係冇貼,我感受唔到任何佢貼到我。」

報道出咗後,靚湯表示好唔開心同好唔鍾意,問佢同鄭子邦會唔會過電?佢諗都冇諗就話:「唔會,我o依家專注工作,冇發展對象,今年我預咗單身過聖誕。」至於係咪報道出咗先冇發展機會?佢就話:「本身都唔會有,大家係好朋友嘅相處。」咁又怕唔怕嚇怕其他追求者?靚湯就表示:「我係女仔,咁樣寫,梗係唔鍾意同唔開心,但都OK,我接受咗自己嘅性質,只係怕啲人對我有誤解。」問佢單身點過聖誕節?佢話:「o依家拍緊《機場特警》,如果請到假,我想同屋企人去一個有雪嘅地方過聖誕。」咁咪冇得晒泳衣照?佢笑住話:「可以去瑞士雪山嘅溫泉,到時叫阿妹着泳衣。」

娛聞樂陪你走遍全球追星,即Like「娛果」FB 專頁!
BannerBanner