【仲有星爺】楊冪唐嫣再度同場 馮小剛現身華表獎

更新時間 (HKT): 2018.12.08 22:36
(微博圖片)

今晚喺北京舉行嘅《第十七屆中國電影華表獎》,官方話有近300位電影人出席,而內地演員都傾巢而出,包括李冰冰、周迅、湯唯、章子怡、黃曉明、鄧超、楊冪、唐嫣、黃渤、周冬雨等,久未出席公開場合嘅導演馮小剛等。香港嘅代表就有周星馳、導演王家衛,以及謝霆鋒、惠英紅等,可謂星光熠熠,而李冰冰同黃渤擔任今晚大會司儀。

曾經係好姊妹嘅楊冪同唐嫣傳不和後,唐嫣今年10月喺維也納結婚時,楊冪都冇出席。繼上個月兩人喺北京活動上同場互當透明後(相關新聞︰ https://bit.ly/2QlWQJQ),今晚二人再度同場,楊冪一身黑色吊帶晚裝打扮,同唐嫣嘅紅色露肩晚裝,各有特色,但二人未有任何互動。

至於導演馮小剛,因逃稅風波後,神隱3個月後,上月尾曾現身湖南參加一個文化活動,特意去毛澤東故居參觀(相關新聞︰ https://bit.ly/2SAV7gp)。直至今晚馮小剛同老婆徐帆一齊現身,但鏡頭下嘅佢卻目無表情。

至於今晚嘅得獎名單,包括林超賢憑《紅海行動》獲優秀導演獎,呢套戲仲成為十部優秀故事片獎其中之一,而林超賢另一部電影《湄公河行動》同獲此獎。至於周迅主演嘅《明月幾時有》、劉偉強執導嘅《建軍大業》,同埋吳京主演嘅《戰狼2》同獲優秀故事片,而吳京憑《戰狼2》獲優秀男演員,至於優秀女演員係《十八洞村》嘅陳瑾。

娛聞樂陪你走遍全球追星,即Like「娛果」FB 專頁!
BannerBanner