【爆相爆片】全球得500架 郭富城花750萬買超跑

更新時間 (HKT): 2018.12.09 00:00

最近染咗一頭金髮嘅郭富城,日前出席完慈善活動後,即趕住返屋企,唔通掛住老婆同囡囡?可能係,但亦可能唔係,因為佢為咗件新玩意。向來出名愛車嘅城城,先後收藏過多部限量版名車,架架車都動輒幾百萬,甚至過千萬。本月1日,佢出席完活動後,即趕返屋企,原來有件新玩意等緊佢。

讀者陳先生透過《蘋果》爆相爆片表示,當日下午約4點左右,陳先生坐車經過城城位於大坑道嘅屋苑時,見到屋苑外有一部大型貨車,正卸下一架黑色超級跑車,陳先生話︰「我坐車經過見到架大貨車停咗喺行人路上,留意到落緊架黑色跑車,戴住帽嘅城城,企喺度全程睇住架車落地,之後仲影相。」

陳先生表示因為架跑車落地時好高調,所以先留意到,陳先生話︰「架貨車停喺行人路上,經過一定見到,好高調。」睇番陳先生拍嘅相同片,睇到穿藍色衛衣,孭住背囊同戴住帽嘅城城,全神貫注睇住部車,仲同身旁嘅外籍人士好好傾,之後城城仲用電話影架車落地嘅情況。

據了解,城城呢架新車係限量版超跑,全球只有500架,仲係以已故車神冼拿嚟命名,價錢方面當然唔平,大約要750萬港幣,成層中價樓嘅價錢。

【編輯推介】

娛聞樂陪你走遍全球追星,即Like「娛果」FB 專頁!
BannerBanner