【港姐有人保護】郭羨妮冇被迫飲酒 汪明荃飲香檳都暈

更新時間 (HKT): 2018.12.09 16:05
(攝影:黃曉妍)

阿姐汪明荃同郭羨妮,今日喺九龍公園出席活動,郭羨妮表示曾經飲少少紅酒就會嘔,所以佢選擇飲健康嘅榨蔬菜汁:「嗰時好細個,讀完大學要慶祝下,飲咗好少紅酒就嘔,好大陰影,覺得好唔舒服。」入行之後,有冇被迫飲酒?佢話:「唔會迫到,因為嗰陣港姐有人保護。」佢指老公朱少杰平時都會飲啤酒,搞到有個睇落似6個月大嘅啤酒肚,所以老公話學佢榨蔬菜汁飲減肥:「幾有效,我生完女之後要減肥,都係飲蔬菜汁,同埋多食菜、唔食碳水化合物。」

兩年做一次全身檢查嘅阿姐,就表示唔鍾意飲酒:「我連飲香檳都暈,但食大閘蟹就會飲少少,因為可以驅寒,政府辦美酒節,有少少矛盾。」會唔會勸朋友戒酒,包括曾志偉?阿姐話:「佢唔會喺我面前飲咁多,因為我唔係佢嘅飲友,佢o依家好咗啲啦。」老公羅家英好唔好酒?阿姐話:「佢都好少飲,食飯會飲少少。」阿姐指家英哥現時喺香港,問到係咪一齊過聖誕?阿姐話:「我要去台灣推廣香港傳統文化。」

娛聞樂陪你走遍全球追星,即Like「娛果」FB 專頁!
BannerBanner