【狗仔出更】黃長發陪捷克老婆逛中環 買童裝贈小孩

更新時間 (HKT): 2018.12.10 00:00

33歲嘅黃長發06年奪港男冠軍後,發生喺佢身上最轟動嘅新聞,相信都係佢09年同年齡相差15載、富商三姨太李姿霆(Karen)嘅姐弟戀。不過,隨着佢淡出娛樂圈,加上15年喺布拉格古堡,迎娶捷克籍模特兒女友Zuzana,善忘嘅港人相信都不大記得關於佢嘅事。

婚後嘅黃長發,同太太嘅感情保持得唔錯,不時都孖住四圍去。日前兩公婆又再出動,大約黃昏6時多,同一位外籍女友人,以及一位外籍小男孩於中環IFC行街買衫。雖然,Zuzana不時都攞住手提電話篤來篤去,但見老公落力幫小男孩揀衫,佢都有俾下意見,最後小男孩睇中一件紅色衛衣,仲即時試上身,黃長發見小朋友揀到心頭好,就豪爽咁攞住件衫同老婆去排隊俾錢。

行完時裝店,一行就轉到附近一間賣日式飯糰嘅店舖買嘢食,最後黃長發買咗兩個飯糰,就企喺門外等埋同行女友人及小朋友,然後一行四人就向停車場方向行去,攞車離開。

娛聞樂陪你走遍全球追星,即Like「娛果」FB 專頁!
BannerBanner