【仲要買多幾架?】郭富城買名車絕不手軟 集齊心頭好會開慈善車展

更新時間 (HKT): 2018.12.12 19:43
城城話希望儲多啲車,將來可以開展覽。

郭富城、楊千嬅今日現身將軍澳出席頒獎活動,早前,城城被《蘋果》讀者發現買咗架超級跑車,仲喺屋企樓下收車添!(相關新聞連結: https://bit.ly/2QrwcPV )城城今日受訪時就笑住話,作為一個愛車之人,佢一直都希望擔任汽車品牌代言人,可惜一直未有機會。

講到佢嘅新車價值不菲,城城話:「架車有個名叫冼拿,係一代車神嘅名,係為咗紀念佢先出,而我一向係佢fans,我覺得值得買。不過架車近千萬,我都諗咗好耐先買,但覺得可以保值。」

城城又話自己一向有收藏名車嘅習慣,有個心願係有一日會開一個展覽,然後將收益捐去慈善機構,回饋社會。問佢幾時會開?佢話:「唔會咁快啦,有啲車我仲儲緊,有啲係2020年先出,我未收集齊。」

一直有傳城嫂再度有喜,當城城講到佢有五座位同七座位嘅家庭車時,即被追問幾時七座位嘅車,幾時會坐滿?但佢即刻封嘴話:「順其自然,多謝大家。」不過,佢都承認鍾意多啲家庭成員:「我媽咪前日84歲生日,好多家庭成員一齊慶祝,如果自己百年歸老,都覺得兒孫滿堂會好開心。」

另外,千嬅話今個聖誕節好忙,因為好快會有音樂上嘅大計劃要公佈。講到2019年,千嬅指會將工作重心放番喺歌唱事業:「今年係有啲愧疚,因為好多時間用咗嚟拍戲,所以明年會回歸音樂同埋家庭,農曆新年都會同囝囝去外地玩。」

娛聞樂陪你走遍全球追星,即Like「娛果」FB 專頁!
BannerBanner