【有洋蔥】《蜘蛛俠:跳入蜘蛛宇宙》動畫版Stan Lee現身鼓勵主角

更新時間 (HKT): 2018.12.14 20:00

《蜘蛛俠:跳入蜘蛛宇宙》今日上映,動畫除咗大獲好評,更有唔少洋蔥位!「Marvel之父」Stan Lee於上月中逝世,佢出名鍾意於Marvel電影中客串,而今次亦都唔例外,動畫版嘅Stan Lee亦有現身於電影中。佢飾演男主角麥爾斯(Miles)購買第一套戰衣嘅服裝店老闆,二人嘅對話就有洋蔥。麥爾斯問:「如果不合身可以退貨嗎?」Stan Lee就話:「會合身的,總有一日。」(“It always fits, eventually.”) 意味住麥爾斯總有一日會成為真正嘅蜘蛛俠。

另外,觀眾如果夠細心,都會見到Stan Lee於服裝店附近出沒,又有一幕當麥爾斯同彼得柏加(Peter Parker)為咗逃過警察追捕而空降於紐約市馬路上,Stan Lee若無其事地跨過二人;仲有當麥爾斯於地鐵旁盪過時,Stan Lee於窗旁擺出蜘蛛俠姿勢,一貫鬼馬作風。

娛聞樂陪你走遍全球追星,即Like「娛果」FB 專頁!
BannerBanner