【狗仔出更】選情告急要出手拉票?李佳芯打人情牌補飛爭視后

更新時間 (HKT): 2018.12.14 00:01

一年一度嘅台慶頒獎禮將會喺周日,即係16號舉行,雖然唔少觀眾都覺得大台劇集越嚟越膠,有人仲話索性唔睇,之不過正所謂「百貨應百客」,所以點都有捧場客!今年視帝同視后之爭,坊間有唔少人都覺得視帝冇視后鬥得咁激烈,事關今年大台安排《大帥哥》未播已經有提名,張衞健可以話坐亞望冠登上呢個視帝寶座,唯一嘅對手亦都係今年一口氣拎咗大馬同新加坡視帝嘅袁偉豪!

相比之下視后嘅競爭就激烈好多,今年嘅熱門除咗《BB來了》嘅李佳芯(Ali)之外,《宮深計2深宮計》嘅陳煒同《三個女人一個「因」》嘅黃智雯同樣被視為熱門人選,煒哥仲講到明話恨攞獎,除咗係演技被肯定之外,仲可以重拾自信喎!煒哥之所以咁講,當然有佢嘅隱憂,事實上李佳芯同黃智雯呢兩個對手又係好強,尤其係李佳芯,佢一向都好得高層歡心,不過近日有傳Ali因為推劇而得罪高層,仲親手將視后推走埋,唔知係咪呢個原因,Ali日前出席活動,笑笑口話要拉票,仲話會叫身邊嘅人同屋企人投票,向外就要靠大家(新聞連結: https://bit.ly/2EsmeHB )。

坐言起行嘅Ali,日前喺尖沙嘴出席完活動,好識做咁留喺現場同啲嘉賓影相,擾攘咗半個鐘後,去停車場又同fans影相兼合照,全程都冇托手踭,Ali仲叫啲fans小心啲車,直到有商場保安去到話嗰個位唔畀企,一班fans先乖乖放人,Ali就揸車返將軍澳嘅寓所。

唔知呢招人情牌,最終可唔可以幫手呢?

【編輯推介】

娛聞樂陪你走遍全球追星,即Like「娛果」FB 專頁!
BannerBanner