【搶閘結婚】周勵淇同阿Sa爭花球 擇偶條件越降越低

更新時間 (HKT): 2018.12.17 16:57
(資料圖片/右﹕壹週刊圖片)

周勵淇(Niki)今日宣佈已成為人妻,與大陸演員傅浤鳴結婚。其實Niki喺今年9月出活動時已經暗示過恨嫁,講到自己去唔到卓韻芝婚宴,但覺得對方應該留個花球畀自己,Niki話﹕「班姊妹團之中都係得我同阿Sa未結婚,阿Sa都結過,應該留番畀我,兩姊妹冇所謂,我都希望佢快啲,但佢成日都話已經結過啦。」

而Niki前年接受《蘋果》訪問,被標籤為「黃金盛女」嘅佢開出擇偶條件,佢話字典入面冇理想情人,大家要click到,對方唔一定有錢或富豪。事隔一年(即上年)佢再接受《蘋果》訪問,Niki稱繼續單身,佢當時講笑話擇偶條件略為降級:「我已冇乜要求,之前有講要憑感覺,靚仔梗係好啦,呢個世界冇人唔鍾意靚仔靚女,情人眼裏出西施,當你覺得佢好,咁就乜嘢都靚㗎喇,乜嘢都係有感覺先得,鍾意就講個feel。」

2017年嘅Niki當時話準備好隨時迎接一段新感情,到時會唔會閃嫁?佢話:「好多人問過我幾時結婚生仔,我真係唔知,我唔知下一個搵到嘅係咪結對象,如我突然閃婚,可能我已拍拖兩個月或半年,嗰段時間已經超越以前拍拖嗰段好長時,每段時間,成長、思維都唔同咗,o依家會唔諗咁多,可邊結婚,邊拍拖,亦可邊生仔邊結婚,同步進行。我希望將來結婚後有家庭有小朋友,仍可維持初衷,有愛喺一齊。」

結果,喺訪問中講過「2018年,差唔多啦,我feel到好近。」嘅Niki,今日宣佈已經結咗婚,真係恭喜晒!

娛聞樂陪你走遍全球追星,即Like「娛果」FB 專頁!
BannerBanner