【廿四孝老竇】為咗個仔被圍攻 「宇宙最強」甄子丹:冇得還擊

更新時間 (HKT): 2018.12.17 16:10
(攝影:卓寶花)

保良局主席蔡李惠莉和丈夫蔡志明、兒子及新抱蔡加讚與汪圓圓,仲有甄子丹同太太汪詩詩帶同一對仔女,噚晚喺灣仔出席保良局慈善舞會,陳志健缺席台慶,反而同太太一齊亮相活動。

甄子丹大女蹺實爸爸現身,女兒已經同爸爸差唔多高,甄子丹話:「時間過得太快,好慶幸阿女高過我,似太太。」甄子丹日前專登返港為兒子慶生,佢話:「玩得好開心,睇住小朋友長大,真係好多感觸,我哋搞咗個生日派對,同廿幾位小朋友一齊玩雷射槍,啲小朋友好勁呀,前後圍攻我,冇得還擊。」

早前電影《冰封俠:時空行者》的風波(新聞連結: https://bit.ly/2STUbDZ ),甄子丹話:「一切交由律師處理,電影拍5年,其實仲未拍完,有好多後期工作未完成,突然內地發行要上映,當時我忙緊拍電影抽唔到時間宣傳,結果就借呢單新聞宣傳,好離譜,之前有好多對我不利,同假新聞我都唔理,但今次太誇張,呢種宣傳劇本實在寫得太差,咁多破綻,今次唔係為自己澄清,係對整個電影風氣問題。」同發行商有聯絡?佢話:「冇,佢哋立即刪除網上言論,知道錯,身有屎。」事件涉及香港HMV數碼中國有限公司對部份合約演員拖糧,甄子丹話:「我唔知道有冇出糧,只知道好多尾期未收到。」

蔡李惠莉聖誕節喺平安夜當晚會在家舉行聖誕派對,除咗邀請樂隊表演外,仲要一次過買8份禮物給8位寶貝孫仔孫女。

娛聞樂陪你走遍全球追星,即Like「娛果」FB 專頁!
BannerBanner