【周勵淇結婚】05年拍劇撻着 舊愛鄭嘉穎送上祝福:恭喜她

更新時間 (HKT): 2018.12.17 19:50
周勵淇嘅情路,一啲都唔平坦

【新增回應】

前名周麗淇嘅周勵淇(Niki),情場上屢敗屢戰。05年佢同鄭嘉穎因為拍無綫劇《天幕下的戀人》撻着,並傳Niki因為嘉穎而同拍拖5年嘅布廠少東Jordan分手。Niki同嘉穎初時都唔肯承認戀人關係,直至07年3月,嘉穎被傳媒影到深宵夜訪緋聞Niki香閨,佢哋先至正式公開戀人關係。

可惜,呢段戀情僅維持3年就結束,08年傳出嘉穎搭上佘詩曼而狠撇Niki,由於當時Niki不時以受傷害姿態出現,令到阿佘背上第三者之名,不過,當時亦有指其實嘉穎同Niki分咗手之後先至同阿佘拍拖,根本唔關阿佘事。

同嘉穎分咗手之後,Niki同紗廠太子爺 Eric拍拖,不過都係分手收場。甩拖後,Niki火速搭上富二代藝人徐正曦,兩個人13年喺上海橫店拍《衞子夫》時撻着,之後不時公開晒恩愛,但拍拖2年,又係分手收場。

舊年7月,有周刊爆出Niki搭上人夫傅程鵬,亦即係Niki o依家丈夫傅浤鳴,當時報道指佢哋14年喺大陸拍《卧底》認識,傅程鵬係大陸演員,亦係南京軍區前線文工團,一向有好好先生之稱,同太太程愫有個囝囝,今年8歲,不過,盛傳Niki介入,傅程鵬終於喺舊年3月同結婚多年太太離婚,但對於同傅程鵬,Niki一直否認拍拖,估唔到今日,佢竟然公告天下同已改名傅浤鳴嘅傅程鵬結咗婚。

《蘋果》今日聯絡鄭嘉穎,對於Niki宣佈結咗婚,鄭嘉穎回應話:「結婚開心事,恭喜她。」

娛聞樂陪你走遍全球追星,即Like「娛果」FB 專頁!
BannerBanner