【周勵淇閃婚】阿Sa大懵搞錯時間錯過婚禮 Mani代稱低調簡約溫馨

更新時間 (HKT): 2018.12.17 17:08

周勵淇(Niki)今日忽然宣佈結婚,閨密蔡卓妍送祝福:「恭喜佢哋,戥佢哋開心,最衰我搞錯時間,去唔到佢哋個婚禮,都想親身去賀佢哋,等我遲啲請番佢哋食一餐先。」

Niki今年中先加盟英皇,仲由「周麗淇」改名做「周勵淇」,當時英皇高層霍汶希(Mani)就話「勵」更有正能量,對Niki所有嘢會提升。

呢次改名真係立竿見影,連身份都提升埋,Niki突然宣佈成為人妻。Mani今日喺十大中文金曲頒獎禮回應番Niki閃婚,Mani笑言又有藝人結婚:「如果大家想結婚,不防(妨)加入我哋公司。」

Mani話:「我本身都想去飲,不過出席唔到,佢喺外地擺酒,party只係雙方親戚出席,我好忙出席唔到。」問到Niki幾時通知公司?Mani話:「其實都通知咗一段時間,佢想低調處理,佢一直都想簡單啲,所以party都係簡單而溫韾。」

Mani都有見過Niki老公傅浤鳴,佢讚Niki老公好有禮貌好純品,又代Niki講暫時冇造人計劃,又話:「其實兩人相信諗清楚之後,先去另一個階段結婚。」至於兩人幾時拍拖?Mani解畫:「佢哋拍戲相識,之後有段時間分開做嘢,之後再撞番就拍拖喇。」

咁突然閃婚,Mani就只係話係成熟時間做嘅決定,之後Niki唔會喺香港補擺婚宴,希望一切簡約。而佢就送咗金豬俾Niki,代表好有福氣,希望佢哋開枝散葉。

嚟緊好快就到阿嬌結婚,Mani話一樣會送金豬,驚唔驚藝人結晒婚會退休?Mani話:「唔會,工作決定排好晒,好似阿嬌結婚之後努力咗,長大咗。」

娛聞樂陪你走遍全球追星,即Like「娛果」FB 專頁!
BannerBanner