【24至26號都要開工】黃浩然被監製邀請過聖誕:我即刻叫佢走開

更新時間 (HKT): 2018.12.19 16:55
(攝影:陳俊強)

黃浩然、唐文龍、姜皓文、蔣怡(Coco)等,今日喺土瓜灣出席慈善賣嘢王活動,為願望成真基金籌款幫助病童。Coco兒時夢想好簡單,佢話只有朱古力就氹到佢好開心,藍帶畢業嘅Coco到大個先發現有烹飪天份,佢話:「依家夢想係做廚師,我都會諗住做生意,不過暫時開餐廳唔適合我,因為我乜都要親力親為,同時要照顧家庭會難啲,或者會出醬料,亦籌備緊自己嘅廚房,開親子班,教家長煮嘢食,希望香港多啲媽咪親手煮嘢食畀小朋友,呢種係愛,將愛傳承。」佢仲爆囡囡讚隔離屋企飯香,只係鍾意食鄰居煮嘅飯餸,搞到Coco勁傷心。

另外,浩然捐出一隻拍劇時所戴嘅手錶,佢話:「手錶有紀念價值,時間亦好重要,今次拍賣係好有意義,幫助患病嘅小朋友,小朋友會有夢想,達到夢想就最開心,希望可以幫助到病童,讓佢哋開心快樂咁去打仗。」浩然仲話會向演員同事們呼籲,捐出物品拍賣,佢又構思一齊合照兼簽名,攞出嚟拍賣。

提到浩然月頭同太太結婚13周年,仲喺網上高調放閃,浩然話:「係月頭嘅事,冇時間慶祝,聖誕節24至26號都要開工,監製仲走嚟同我講會同我一齊過聖誕,我即刻叫佢走開,我叫佢點都畀我31號放一日,畀我食餐飯都好。」問到太太有冇詐型?浩然話:「太太就冇,囝囝就多啲,太太都忙緊電影工作,依家靠媽媽同外母照顧小朋友,我會砌定聖誕樹畀囝囝。」

娛聞樂陪你走遍全球追星,即Like「娛果」FB 專頁!
BannerBanner