【最重要有人湊仔】千嬅投老公旗下搵真銀 動員全家搞世界巡迴

更新時間 (HKT): 2018.12.20 17:32
採訪、攝影:曾小嘉

楊千嬅今日現身北京為明年開始嘅《My Beautiful Live 世界巡迴演唱會》舉行記者會,獲不少朋友包括劉德華、張學友、郭富城、古天樂、鄭秀文及余文樂等拍片支持,又安排兩位大陸歌迷上台同千嬅互動。

同時記者會上又公佈簽約老公丁子高開設嘅「正向娛樂」成為旗下藝人,實行夫妻檔舉行巡演,並即場進行簽約儀式,千嬅笑言好似喺台上再次證婚咁,佢透露今次同老公嘅合作事源係兩年前一齊去韓國睇Big Bang演唱會,佢話:「當時係戶外騷,見到啲歌迷好熱情,現場氣氛好好,我同老公講『我諗呢世都唔會有呢啲機會』,點知老公翹埋雙手好Cool咁講『個騷都未開始』。」千嬅話估唔到老公一直將佢呢番說話放喺心,仲真係幫佢實現到,講到佢自己都有啲眼濕濕。

千嬅喺受訪時表示巡演會包括大陸、澳紐、美加及倫敦等地:「第一站會係三月廣州,最希望尾站會返嚟香港。」又強調自己真係無諗過有機會再做巡演:「已經結咗婚,有小朋友就要對佢哋負責任,所以今次巡演好多謝屋企人總動員幫手。」至於囝囝Torres,佢話都有同佢解釋:「佢o依家好明㗎啦。」

千嬅話無諗過老公會將佢講過嘅嘢放喺心:「真係好多謝佢,我都想有生之年做到今次巡迴,第時我唔喺度個仔都可以睇番。」講到同老公夫妻檔工作,千嬅話:「其實都有啲冒險㗎,始終依家有兩個身分,佢繼續要忙自己公關公司,所以都好辛苦。」

娛聞樂陪你走遍全球追星,即Like「娛果」FB 專頁!
BannerBanner