【《我們正在》演唱會】何韻詩獻唱《青春祭》 盧凱彤留下的作品

更新時間 (HKT): 2018.12.21 22:26

何韻詩今晚喺科學園開《On The Pulse Of 我們正在》演唱會,演唱會入面唱咗唔少經典歌曲,好似有《再見露絲瑪利》,唱完之後佢仲同觀眾講:「開心呢,10世無唱,有無人記得上次唱係幾時?正確答案係我自己都唔記得。今次演唱會係一個旅程,我哋都老啦,呢樣無得唔認,生活上有咁多經歷,開心唔開心嘅情緒都有過,亦有過無助時候,所以今次係向心探索嘅旅程。」

之後阿詩換上米白色乾濕褸唱出《青春祭》,呢首歌係盧凱彤(Ellen)作畀阿詩嘅一首歌,呢首歌之後,阿詩就唱梅艷芳嘅《似是故人來》及Ellen另一首作品《大拇指之歌》。

阿詩又話要多謝所有工作人員,先有呢個聖誕禮物送畀大家,好彩天公造美,佢話:「戶外演出好大膽,早知就開兩場啦,開六場真係有啲淆底。真心希望大家都可以撐住,從容面對所有困難,見到我企喺度唱歌應該點都畀到少少動力你哋,事關我經歷嘅高高低低,高峰低谷多過常人好多倍。」然後阿詩再唱一首新歌《代你白頭》,佢話:「啱啱噚日先收到呢份禮物,係黃偉文填詞,首歌我自己寫,一個好新嘗試,我奉獻咗十六個字,首歌係送畀一個人嘅。」仲話聽日會上載歌詞到網上,估計係送畀盧凱彤嘅歌。阿詩填嘅詞就係:「星際 銀河 數盡 細沙 一剎 恆河 返回 最初」

娛聞樂陪你走遍全球追星,即Like「娛果」FB 專頁!
BannerBanner