【演出先嚟落雨】周國賢加場即興演出 鍾舒祺嘆冇得睇閃靈:係香港市民損失

更新時間 (HKT): 2018.12.23 15:22

原定今日下午一點喺科學園為《我們正在音樂節2018》演出嘅台灣樂隊閃靈,因遲遲不獲香港發出簽證,未能如期演出(新聞連結: https://bit.ly/2SixFVu ),最後由噚日曾演出的嘉賓周國賢仗義相助今日再唱一場。

噚日好有信心今日會烈日當空嘅周國賢(新聞連結: https://bit.ly/2Lv8dJT ),今日冒雨演出,獲近300觀眾喺微雨下捧場,周國賢一個人拎住支結他上台,再問觀眾想聽甚麼歌,當聽到歌名就隨即彈奏獻唱,實行隨心所欲去完成大約45分鐘演出,但佢事後並無受訪。

跟住出場演出嘅鍾舒祺(Sukie)表示雖然未能看到閃靈演出,但能夠聽到周國賢都開心,本身都提早到場支持,佢話自己佢之前喺灣睇過閃靈演出,仲大讚精彩,Sukie話:「今次係香港市民損失,但可以去台灣睇騷,台灣有好多樂隊好精采,我1月30號都去台灣睇Mr.Children。」問到會否擔心日後創作空間受掣肘?Sukie話:「我從來都唔覺得有咩掣肘,因為我都係做自己音樂,所以比較自由啲,而且Carl叔叔(王雙駿)亦都可以幫我做到好多我想做嘅歌。」

除咗演出歌手,唔知啲觀眾點睇?

陳小姐:我係買兩日入場證,知道閃靈嚟唔到都有少少失望。(對於音樂表演但不獲簽證,會唔會覺得越來越多掣肘?)都會,今日睇到周國賢演出覺得好正,冇失望。

湯先生:今日純粹支持音樂節,收到閃靈因未獲簽證而未能演出都有失望,因為之前有聽開佢哋嘅音樂,都想順道可以聽埋,之前未曾試過睇過佢哋現場演出。(會唔會擔心以後想睇嘅樂隊同樂手,想嚟香港演出,因入境問題被影響?)呢樣毋庸置疑,今次都唔係第一單發生,之前都有Hidden Agenda,發生過類似事件,我都唔意外,將來再發生咁嘅事。(會唔會覺得藝術表演應該同政治分開,唔好混為一談?)我覺得冇辦法分開。(會唔會覺得因為近幾年好多事件都係被混為一談?)係㗎,有陣時唔係表演者有咁嘅心態,係另外一啲人去用保守嘅方法處理呢件事。

娛聞樂陪你走遍全球追星,即Like「娛果」FB 專頁!
BannerBanner