【爆相爆片】一億會長港鴨?銅鑼灣街頭貼范冰冰大字報

更新時間 (HKT): 2018.12.25 19:34
今日喺銅鑼灣街頭出現有范冰冰嘅大字報。(右圖︰讀者提供圖片)

大陸女星范冰冰,因逃稅風暴,被追繳及罰款共8.84億人民幣(約10億港元)。事件發生之後,佢一直深居簡出,直至早前才低調返回工作室,疑鋪路復工,而月中佢被網民拍到同男友李晨,深夜外出食火鍋。(相關新聞︰ https://bit.ly/2Q2yCzx)估唔到今日喺香港嘅銅鑼灣鬧市都有范冰冰蹤影出現,當然唔係佢本人,而係一張大字報。

讀者Leo向《蘋果》報料表示,今午約4點半左右,佢路經銅鑼灣希慎廣場對開嘅啟超道,見到地上有一張大字報,佢話︰「我見有好多人圍觀,所以行過去睇吓,張紙有一個男人相同范冰冰嘅相,又寫住啲個人資料,人名、身份證號碼、公司名同電話號碼,內容係講啲走資、地下錢莊嘅嘢,仲寫住想中央嘅警方打畀佢,但唔接受香港警方打畀佢,入面仲有幾個字塗黑咗。」

其實張大字報指相中男子,疑同范冰冰有關連,最上方有男子嘅相,相嘅左上角寫住︰「范爺一億會長港男」,而中間位就大大隻字寫住︰「XXX,一億港鴨,范冰冰」跟住下方就有張范冰冰嘅相。大字報嘅下方有一段文字,但文中內容冇提及范冰冰。本報今日曾致電大字報中提供嘅電話,但打過去一直都係未能接通。而本報記者大約5時13分左右,曾到該處視察,呢張大字報已經冇咗。

娛聞樂陪你走遍全球追星,即Like「娛果」FB 專頁!
BannerBanner