【扶實老婆】看台親自督戰愛駒 城城贏馬開心到振臂高呼

更新時間 (HKT): 2018.12.29 17:55

郭富城今日帶埋懷孕嘅太太方媛同囡囡Chantelle現身沙田馬場,為新馬「舞士精神」嘅首次出賽親自督戰,比賽為第七場一千米賽事,6號嘅「舞士精神」賽前已經係大熱門,賽前城城就拖住太太現身沙圈近距離視察愛駒,囡囡未有現身,相信係留喺貴賓房,見到方媛腹大便便,城城出入同上落樓梯都好小心咁拖實老婆。

城城一出現已經吸引好多馬迷起哄及影相,喺沙圈期間見到城城好風騷,不斷同人影合照同傾偈,而旁邊嘅方媛仲拎起電話替愛駒影相。比賽期間城城同方媛及經理人小美都企出貴賓房隔住欄桿觀看比賽,城城同方媛都睇得好緊張,最終「舞士精神」順利大熱勝出,衝線期間城城開心到振臂高呼,然後分別同經理人小美擊掌又擁抱方媛,贏頭馬嘅佢仲向觀眾席揮手及舉V字手勢,唔少被帶挈贏錢嘅馬迷向佢歡呼。

賽前對勝算表示平常心,結果成功贏頭馬嘅城城接受訪問時表示好開心,問到係唔係覺得小朋友腳頭好?佢笑笑口話:「太太同小朋友今日嚟咗,原本諗住帶佢出嚟,但係見好多人於是就留佢喺貴賓房,佢頭先都玩得好開心好活躍,仲係咁跳舞。」仲話等囡囡大個啲考慮俾佢學騎馬。

對於馬匹首次出賽就勝出,城城話要多謝練馬師方嘉柏:「阿方同我講隻馬狀態唔錯,好好彩今次有好多對手但係都順利贏到,我喺呢度代隻馬多謝大家支持。」問到自己有冇落重注?佢笑言:「都係例飛幾千蚊啦。」打算點慶祝?佢話:「仲未諗到,或者到時食餐飯啦。」

城城又透露聽日就要起程去大陸繼續做巡迴演出,提到劉德華昨日因病腰斬演唱會,城城話:「我有睇到報道,作為同行我都希望華仔早日康復,始終隔咗咁多年,觀眾都好想睇佢演出。」佢表示自己會做足保暖措施:「因為喺大陸天氣好凍,自己長時間都會帶住頸巾保暖。」

娛聞樂陪你走遍全球追星,即Like「娛果」FB 專頁!
BannerBanner