【下個月開新戲】擬與女兒相聚過年並休養 志偉提早回台

更新時間 (HKT): 2018.12.30 22:25

【新增內容】

曾志偉喺北海道遇車禍後,今晚單獨趕返台灣,佢隨即搭車去女兒曾寶儀屋企,志偉到達後,有一個着住藍色衫嘅短髮女子出嚟接佢。佢喺機場時話自己因為就快要開工,所以要趕住返劇組。

原來志偉係為咗自己有份投資,並同台灣資深女電影製片人葉如芬,共同擔任監製27歲新導演徐嘉凱嘅實驗性「區塊鏈」(block chain)主題電影《聖人大盜》趕開工,志偉本身都有份參演,雖然戲份唔重,但就係一個關鍵角色。

據知,志偉戲份會喺1月初先開始拍,相信佢今晚趕返台灣,係想同個女曾寶儀相聚過新年,同埋休養一陣,先至正式開工拍攝。

原來今次《聖人大盜》,係志偉有次去到徐嘉凱間酒吧後,得知對方正喺度拍電影,一向支持新導演嘅志偉就叫對方攞劇本畀自己睇,點知明明上到飛機好攰好眼瞓,但最後就一口氣睇完個劇本,仲覺得個劇本有啲似《無間道》嘅初稿,仲心諗「畀徐嘉凱拍有啲浪費」,結果志偉做埋投資者,仲身兼監製同演員,亦表示:「拍這個戲我學會東西,有些東西我沒接觸過,所以我想要參與。」

娛聞樂陪你走遍全球追星,即Like「娛果」FB 專頁!
BannerBanner