【最新圖片】曾志偉單拖抵台否認醉駕 首開腔:整架車在另外一邊飛過來

更新時間 (HKT): 2018.12.30 19:48

曾志偉於聖誕節(25日)喺日本北海道自駕遊,途經余市附近時,同香港警務處刑事及保安處處長李志恒及家人乘坐嘅七人車迎頭相撞,處長及其家人全部受傷,逃過一劫嘅志偉被爆跟年約40歲嘅化妝師Vanus同行。志偉喺上周四發聲明否認醉駕,稱當時冇飲酒,錄取口供後隨時可以離境,又話假期結束後會到台灣繼續電影拍攝工作。

今日日本時間下午約2點幾,讀者羅小姐透過《蘋果》「爆相爆片」報料,話喺札幌新千歲機場嘅lounge見到曾志偉同Vanus一齊,兩個人有傾有講冇避忌,但志偉冇乜笑容,幾乎全程坐喺度休息。

一如志偉之前喺聲明所講,佢係返去台灣。台灣《蘋果》喺香港時間今晚7點幾,喺台灣桃園機場獨家影到志偉,但就唔見佢同行嘅化妝師Vanus,只係得志偉一個人推住行李行出嚟。

志偉見到記者時都有笑住打招呼,亦邊行邊接受記者訪問,佢話:「還好了,就是第5節跟第7節的肋骨裂開一點點,馬上要拍戲,謝謝大家關心。」問佢有冇探過受傷嘅處長?志偉話:「因為他離開我的地方很遠,探過他另外一個朋友,他告訴我他好像比較……嚴重,但是還好,因為手腳好像已經有了感覺,而且已經開始進食,所以我也安心了。因為大家香港人嘛,在日本發生這種事情,呼……命真大,因為我走之前,我去飛機場,他們汽車公司給我看車裏面的錄像鏡頭,我在開,整架車在另外一邊飛過來,滑到我這邊來。」

咁係咪對方失誤大過你?志偉話:「是,因為他們控制不了車,滑過來我這邊,(雪地滑?)對對對,完全控制不了。警方有問我要不要告他們,我說大家都是香港人,又傷得那麼嚴重,告甚麼呀?算了算了算了,我就不告了。」問佢自己傷勢如何?佢話:「還好,也沒有甚麼辦法,就讓他自然好。」

記者追問佢當時開車有冇飲酒?志偉話:「絕對不可能,因為那是一個造酒的地方,所以他們懷疑我是醉駕,是誤會,怎麼可能?日本醉駕很嚴重,大家放心。」

之後志偉就唔再答記者問題,但全程保持微笑,個樣好輕鬆,跟住邊行邊打電話;其間有嚟自杭州嘅女fans用手機影志偉,女fans接受訪問時話:「第一次看到真人,比我感覺年輕。」

娛聞樂陪你走遍全球追星,即Like「娛果」FB 專頁!
BannerBanner