【韓流】話題劇《天空城堡》爆第一宗醜聞 22歲趙炳圭涉校園暴力

更新時間 (HKT): 2019.01.01 20:00
22歲趙炳圭否認涉校園暴力

韓國收費台JTBC話題新劇《天空城堡》(Sky Castle),劇中講述一班韓國怪獸家長,成班貴婦入住「Sky Castle」別墅住宅區內,佢哋一邊扶助丈夫事業,另一邊就要培育子女入讀名牌大學,呢班貴婦仲不時勾心鬥角,平面上就好似好friend咁,但實際上就互相比較,力保自己嘅權益。

由於《天空城堡》喺韓國勁受歡迎,連帶劇中嘅演員都人氣急升,當中喺劇中飾演車基俊一角嘅22歲趙炳圭近日就被爆涉校園暴力,喺網上有人發文指「趙炳圭校園暴力加害者」,發文嘅人仲提供趙炳圭嘅證件相,發文者自稱同趙炳圭係中學及小學同學,文中指趙炳圭會公開評價女性嘅雙腿,又會喺佢(發文者)路過時向佢吐口水及責罵,同時又指趙炳圭會周圍向朋友講佢(發文者)有一陣味,又話佢想過自殺云云。

發文者指希望大家知道趙炳圭唔係一個善良嘅人,對於《天空城堡》爆出第一宗醜聞,趙炳圭方面都即時作出澄清,並否認有關事實。趙炳圭通過官方粉絲俱樂部回應,指自己只係喺韓國讀中學大約9個月,其餘日子都喺紐西蘭留學,佢強調自己同原來嘅中學同學冇乜交流,而且佢亦從來冇作出校園暴力嘅行為。同時趙炳圭唔希望因為自己嘅爭議而影響到劇組,又指:「如果呢啲傳聞繼續擴大,咁樣我會喺劇集結束後通過事務所發表正式立場。」

娛聞樂陪你走遍全球追星,即Like「娛果」FB 專頁!
BannerBanner