【應該會爆鏡喎…】龔嘉欣着三點式開工 「御用攝影師」何廣沛預告影爛鏡頭

更新時間 (HKT): 2019.01.01 16:22
(攝影:曹家誠)

元旦日龔嘉欣同何廣沛一齊出動,去咗油塘出席活動,噚晚除夕,兩人都話喺工作中度過,其中龔嘉欣話:「我同『少婦聯盟』出席活動,而且啱啱喺年尾拍咗個健康產品廣告,算係過咗個肥年。」又直言2018年係豐收年,工作量大增之餘,收入當然有進賬。至於何廣沛就話去咗澳門倒數:「喺戶外唱歌,噚晚天氣好凍,我一路唱一路流鼻水。」

兩人又表示下月會一齊出埠拍攝旅遊節目,龔嘉欣話:「我哋會去陽光與海灘嘅地方,我已經帶埋三點式泳衣,何廣沛就會着三角泳褲,知道同佢去我好開心,因為佢影相好靚,到時會幫我影好多相。」但旁邊嘅何廣沛就笑話:「監製冇同我講要着三角泳褲喎,你咁靚,我實會影爛支鏡頭。」

龔嘉欣又話因為啱啱拍完劇,身型操到好Fit,所以唔想浪費:「我操到咩線都出晒嚟,講緊馬甲線,咁梗係唔好嘥喇!」何廣沛就話因為咁,所以呢排要密密加操,練出6嚿腹肌。

娛聞樂陪你走遍全球追星,即Like「娛果」FB 專頁!
BannerBanner